विद्यापीठातील हॉस्टेलमध्ये राहण्याचा मुलांचा प्रश्न मिटला?; नव्या 320 जागा उपलब्ध
विद्यापीठातील वसतिगृह क्रमांक 1 ते 9 येथे आतापर्यंत सुमारे 570 विद्यार्थ्यांना राहण्याची सुविधा उपलब्ध करून देण्यात आली आहे. परंतु, अजूनही विद्यापीठाकडे वसतिगृहासाठी अर्ज केलेल्या विद्यार्थ्यांची संख्या 346 एवढी आहे. त्यात आता वसतिगृह क्रमांक 10 मधील प्रवेश सुरू करण्यात आले आहेत.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठातील (Savitribai Phule Pune University)विविध विभागांमध्ये प्रवेश घेतलेल्या प्रत्येक विद्यार्थ्याला वसतिगृह मिळावे, अशी मागणी सातत्याने विविध संघटनांकडून केली जाते. त्यात आता विद्यापीठ प्रशासनाने (University Administration)वस्तीगृह क्रमांक 10 मधील (Hostel No.10)तीन मजले वापरासाठी उपलब्ध करून देण्याचा निर्णय घेतला आहे. त्यामुळे सुमारे 320 विद्यार्थ्यांना वसतीगृहात राहण्याची सोय निर्माण झाली आहे. परिणामी विद्यापीठाकडे वसतिगृहासाठी (University hostel)अर्ज केलेल्या सर्व विद्यार्थ्यांना आता वसतिगृह मिळण्याची शक्यता निर्माण झाली आहे.दरम्यान, काही विद्यार्थ्यांनी वासतीगृहासाठी विद्यापीठाच्या मुख्य इमारतीसमोर सोमवारी आंदोलन सुरू केले होते.
'ऑक्सफर्ड ऑफ द ईस्ट' म्हणून ओळखल्या जाणाऱ्या सावित्रीबाई फुले पुणे विद्यापीठात केवळ महाराष्ट्राच्या किंवा भारताच्या काना-कोपऱ्यातूनच नाही तर जगभरातील विद्यार्थी प्रवेश घेतात. मात्र,प्रत्येक विद्यार्थ्याला विद्यापीठात वस्तीगृह मिळतेच, असे नाही. परंतु,विद्यापीठातील वसतिगृह क्रमांक 1 ते 9 येथे आतापर्यंत सुमारे 570 विद्यार्थ्यांना राहण्याची सुविधा उपलब्ध करून देण्यात आली आहे. परंतु, अजूनही विद्यापीठाकडे वसतिगृहासाठी अर्ज केलेल्या विद्यार्थ्यांची संख्या 346 एवढी आहे. त्यात आता वसतिगृह क्रमांक 10 मधील प्रवेश सुरू करण्यात आले आहेत. विद्यापीठाच्या वसतिगृह कार्यालयातर्फे प्रवेशासंदर्भातील परिपत्रक प्रसिद्ध करण्यात आले आहे. 25 ऑगस्टपासून प्रवेशाला सुरुवात केली जात असल्याचे त्यात नमूद करण्यात आले आहे.
सावित्रीबाई फुले पुणे विद्यापीठातील विविध विभागांमधील प्रवेश प्रक्रिया पूर्ण झाली असून अनेक विभागांमधील विद्यार्थ्यांनी वसतिगृह मिळण्यासाठी अर्ज केला आहे. वसतिगृह कार्यालयाने संबंधित विभाग प्रमुखांना वेटिंगवर असणाऱ्या विद्यार्थ्यांच्या बाबतचे ईमेल पाठवले आहेत. परंतु, विभागप्रमुखांकडून याबाबत रिप्लाय येत नसल्यामुळे वेटिंगवर असणाऱ्या विद्यार्थ्यांचे प्रवेश रखडले आहेत. वसतिगृह क्रमांक दहा मधील जागांवर प्रवेश देण्यासाठी सुमारे दीडशेहून अधिक विद्यार्थ्यांच्या संदर्भातील मेल विभाग प्रमुखांना पाठविण्यात आले आहेत. त्यामुळे या विद्यार्थ्यांची प्रवेश प्रक्रिया पूर्ण झाल्यानंतर उर्वरित विद्यार्थ्यांना सुद्धा प्रवेश दिले जाणार आहेत. विद्यापीठाने वसतिगृहांची संख्या वाढवल्यामुळे विद्यार्थ्यांना राहण्याची सोय निर्माण होत आहे. सध्या सुमारे 600 विद्यार्थ्यांची राहण्याची सोय उपलब्ध असून पुढील काळात ही संख्या 1000 ते 1200 पर्यंत वाढणार आहे. मुलींच्या वसतिगृहांची संख्या वेगळी आहे. केवळ मुलांसाठीच 10 वसतिगृह उपलब्ध झाले आहेत. परिणामी विद्यार्थ्यांना विद्यापीठाच्या आवारात राहणे आणि शिक्षण घेणे आता सोपे होणार आहे, असे विद्यापीठाच्या वसतिगृह कार्यालयातील अधिकाऱ्यांनी सांगितले.
