शालार्थ आयडी घोटाळा: 600 हून अधिक शिक्षकांचे बनावट आयडी;48 अधिकाऱ्यांना नोटीस
नाशिक आर्थिक गुन्हे शाखेच्या पथकाने जळगाव जिल्ह्यातील दहा शाळांच्या मुख्याध्यापक व संस्थाचालकांची चौकशी करून काही महत्त्वाची कागदपत्रे ताब्यात घेतले आहे. एसआयटी पथकाने केलेल्या तपासणीमध्ये तत्कालीन शिक्षणाधिकाऱ्यांनी काही अनियमितता केल्याचे आढळून आले आहे.
eduvarta@gmail.com 
एज्युवार्ता न्यूज नेटवर्क
शालेय शिक्षण विभागातील सर्वाधिक मोठा घोटाळा म्हणून चर्चेत आलेल्या शालार्थ आयडी घोटाळ्यामध्ये आता आणखी काही शिक्षणाधिकारी अडकण्याची शक्यता निर्माण झाली आहे. जळगाव जिल्ह्यात 600 हून अधिक शिक्षकांचे बनावट आयडी तयार करून कोट्यवधी रुपयांचा पगार लाटल्याचे उघड झाले आहे. याप्रकरणी शिक्षण विभागातील तब्बल 48 अधिकाऱ्यांना एसआयटीतर्फे सुनावणीसाठी नोटीस बजावण्यात आली आहे.
नाशिक आर्थिक गुन्हे शाखेच्या पथकाने जळगाव जिल्ह्यातील दहा शाळांच्या मुख्याध्यापक व संस्थाचालकांची चौकशी करून काही महत्त्वाची कागदपत्रे ताब्यात घेतले आहे. एसआयटी पथकाने केलेल्या तपासणीमध्ये तत्कालीन शिक्षणाधिकाऱ्यांनी काही अनियमितता केल्याचे आढळून आले आहे. त्यामुळे त्यांना तीन दिवस सुनावणीसाठी बोलावले आहे. अकरा उपशिक्षणाधिकारी तीन कक्षाअधिकारी तसेच वरिष्ठ व कनिष्ठ सहाय्यक अशा एकूण 48 जणांची चौकशी केली जाणार आहे.
शालार्थ आयडी घोटाळ्याच्या माध्यमातून अनेक बोगस शिक्षकांची प्रकरणे उघडकीस आली. त्यात अनेक उपशिक्षणाधिकारी दर्जाच्या शिक्षण अधिकाऱ्यांवर कारवाई करण्यात आली. विधिमंडळात झालेल्या चर्चेनंतर शालार्थ आयडी घोटाळा तपासणीसाठी एसआयटी स्थापन करण्यात आली होती. काही दिवसांपूर्वी या एसआयटीची मुदत संपली होती. परंतु, आणखी काही महिने चौकशीसाठी एसआयटीची मुदत वाढवण्यात आली आहे.
बनावट शालार्थ आयडी तयार करून संस्थाचालक व शिक्षणाधिकारी शासनाच्या तिजोरीवर डल्ला मारत असल्याचे उघड झाले होते. त्यामुळे शालार्थ आयडी घोटाळ्याची चौकशी करण्याबाबत सर्वच राजकीय पक्षाच्या आमदारांनी विधिमंडळात मागणी केली होती. त्यावर शालेय शिक्षण मंत्री दादा भुसे यांनी यासाठी स्थापन करून सर्व प्रकरणाची चौकशी करण्याचे आदेश दिले होते. त्यानुसार शिक्षण विभागातील अनेक अधिकारी पोलिसांच्या निशान्यावर आहेत.
