मोठा निर्णय : नवीन भरतीतून 'पशुसंवर्धन अधिकारी' पद रद्द..

एज्युवार्ता न्यूज नेटवर्क

राज्याच्या पशुसंवर्धन विभागाने (Department of Animal Husbandry) प्रशासकीय रचनेत मोठा बदल करत जिल्हा परिषदेकडील जिल्हा 'पशुसंवर्धन अधिकारी' पद रद्द (The post of 'Animal Husbandry Officer' was abolished) करण्याचा निर्णय घेतला आहे. त्यामुळे पुढील काळात नवीन भरती जाहिरातीमधून पशुसंवर्धन अधिकारी हे पद संपुष्टात येणार आहे. त्यानुसार या पदावरील सर्व जबाबदाऱ्या पशुसंवर्धन उपायुक्तांकडे सोपविण्याचा निर्णय घेण्यात आला आहे. राज्याचे पशुसंवर्धन आयुक्त डाॅ. प्रवीणकुमार देवरे (Animal Husbandry Commissioner Dr. Praveen Kumar Deore) यांनी जिल्हा परिषदांना यासंदर्भात आदेश दिले आहे.

आयटीआय प्रवेशाची पहिली गुणवत्ता यादी जाहीर, १२ जुलैपर्यंत घेता येणार प्रवेश

उपायुक्त पदावर जिल्हा परिषदेचे मुख्य कार्यकारी अधिकारी यांच्यासह पशुसंवर्धन विभागाचे सहआयुक्त यांचे दुहेरी नियंत्रण राहणार आहे. तसेच यापूर्वी जिल्हा परिषदेत अतिरिक्त मुख्य कार्यकारी अधिकाऱ्यांकडे पशुसंवर्धन विभागाची जबाबदारी होती, ती आता मुख्य कार्यकारी अधिकारी यांच्याकडे सोपविण्यात आली आहे. जिल्हा परिषदेतील विभाग संपुष्टात आल्याने सुमारे ४० अधिकारी अतिरिक्त ठरणार आहेत. त्यामुळे पशुसंवर्धन अधिकारी पदांच्या भरतीसाठी तयारी करणाऱ्या उमेदवारांसाठी हा मोठा धक्का मानला जात आहे.

पशुधन विकास अधिकारी संवर्गातील २ हजार ७९५ पदांपाठोपाठ आता सहायक आयुक्त, पशुसंवर्धन या संवर्गातील ३११ पदे भरण्याचा निर्णय घेण्यात आला असून या पदांसाठी महाराष्ट्र लोकसेवा आयोगाने जाहिरात प्रसिद्ध करून प्रक्रिया सुरू केली आहे. सध्या MPSC तर्फे भरती सुरू असून या भरतीला उत्फुर्त प्रतिसाद उमेदवारांकडून मिळत आहे, असले तरी पशुसंवर्धन अधिकारी हे पद रद्द केल्याने राज्यातील शेकडो जागा कमी होण्याची शक्यता आहे. तसेच जिल्हा परिषदेच्या पशुसंवर्धन उपायुक्तांकडे कामाचा अतिरिक्त भार वाढण्याची शक्यता वर्तवण्यात येत आहे.