सिम्बायोसिसच्या प्राध्यापकांविरोधात 'अभाविप'चे आंदोलन; धार्मिक भावना दुखावल्याचा आरोप

एज्युवार्ता न्यूज नेटवर्क

सिम्बायोसिस कला व वाणिज्य महाविद्यालयातील (Symbiosis College) प्राध्यापकाने (Professor) वर्गात शिकवत असताना विद्यार्थ्यांच्या धार्मिक भावना दुखावल्याचा दावा अखिल भारतीय विद्यार्थी परिषदेने (ABVP) केला आहे. या प्राध्यापकाविरोधात गुरूवारी (दि. ३) अभाविपकडून महाविद्यालयासमोर आंदोलन करण्यात आले. दरम्यान, संबंधित प्राध्यापकाला महाविद्यालयाकडून निलंबित करण्यात आले असून डेक्कन पोलीस ठाण्यात गुन्हा दाखल झाला आहे.

सिम्बायोसिस मधील काही विद्यार्थी अखिल भारतीय विद्यार्थी परिषदे कडे हा विषय घेऊन आले होते. त्या वेळी अभाविप च्या कार्यकर्त्यांनी प्रशासनाशी भेटून चर्चा केली, मात्र संबंधित प्राध्यापकावर कार्यवाही करून त्यांच्या निलंबनासाठी ७ दिवसांचा कालावधी लागेल, असे त्यांनी सांगितले. मात्र, असे झाले नाही. त्यामुळे आंदोलन केल्याची माहिती अभावपिकडून देण्यात आली.

यावेळी अभाविप पश्चिम महाराष्ट्र प्रदेश मंत्री अनिल ठोंबरे म्हणाले की, “पुणे हे विद्येचे माहेरघर आहे, येथे विविध ठिकाणांहून विद्यार्थी शिक्षणाकरिता येतात, शिक्षणासारख्या पवित्र क्षेत्रात प्राध्यापक चुकीच्या प्रवृत्ती ने काम करतात, विद्यार्थ्यांना दिशाभूल करण्याचे प्रयत्न करतात, हे अतिशय लज्जास्पद आहे. विद्यार्थी परिषद हे मुळीच सहन करणार नाही. प्राध्यापकाच्या भूमिकेत असल्यास आपल्या वर विद्यार्थ्यांवर संस्कार करण्याची एक जबाबदारी असते, जर प्राध्यापकच समाजात असे तेढ निर्माण करण्याचे कार्य करत असतील तर यावर प्रशासनाने लवकरच आळा घालायला हवा. संबंधित प्राध्यापकाचे निलंबन तर व्हायलाच हवे, मात्र त्याच्यावर कायदेशीर कारवाई करून गुन्हा दाखल करण्यात यावा अशी मागणी अभाविप ने केली आहे”.

दरम्यान, संबंधित प्राध्यापकावर डेक्कन पोलीस ठाण्यात धार्मिक भावना दुखावल्याप्रकरणी गुन्हा दाखल करण्यात आला आहे. याप्रकरणी समस्त हिंदू बांधव संघटनेचे अध्यक्ष रविंद्र पडवळ यांनी फिर्याद दिली आहे. महाविद्यालयाकडून संबंधित प्राध्यापकाला निलंबित केल्याचे समजते.

 शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.

https://chat.whatsapp.com/Ib9LP2jUnnXAQpcKKJ5nWD