दुसऱ्या संधीच्या 'पीसीबी सीईटी'चा निकाल जाहीर; झील हितेश छेडा या विद्यार्थ्यांने दोन्ही परीक्षेत मिळवले १०० पर्सेंटाईल 

या परीक्षेत १०० पर्सेंटाईल मिळवणारे हे सर्व विद्यार्थी महाराष्ट्रातीलच असून, यामध्ये २ विद्यार्थी व २ विद्यार्थिनींचा समावेश आहे.झील हितेश छेडा या विद्यार्थाने दोन्ही परीक्षांमध्ये १०० पर्सेंटाईल मिळवून पराक्रम केला आहे. 

eduvarta@gmail.com eduvarta@gmail.com
Jun 18, 2026 - 19:33 Updated: Jun 18, 2026 - 19:33
0
दुसऱ्या संधीच्या 'पीसीबी सीईटी'चा निकाल जाहीर; झील हितेश छेडा या विद्यार्थ्यांने दोन्ही परीक्षेत मिळवले १०० पर्सेंटाईल 

एज्युवार्ता न्यूज नेटवर्क 

महाराष्ट्र राज्य सामाईक प्रवेश परीक्षा कक्षातर्फे (CET Cell) मे २०२६ मध्ये घेण्यात आलेल्या शैक्षणिक वर्ष २०२६-२७ च्या औषधनिर्माणशास्त्र (Pharmacy) व कृषी शिक्षण (Agriculture Education) व्यावसायिक अभ्यासक्रमाच्या दुसऱ्या संधीच्या पीसीबी (PCB) समूह प्रवेश परीक्षेचा निकाल जाहीर करण्यात आला आहे. या परीक्षेमध्ये राज्यातील ४ विद्यार्थ्यांनी १०० पर्सेंटाईल गुण मिळवून यश मिळवले आहे. या परीक्षेत १०० पर्सेंटाईल मिळवणारे हे सर्व विद्यार्थी महाराष्ट्रातीलच असून, यामध्ये २ विद्यार्थी व २ विद्यार्थिनींचा समावेश आहे.झील हितेश छेडा या विद्यार्थाने दोन्ही परीक्षांमध्ये १०० पर्सेंटाईल मिळवून पराक्रम केला आहे. 

केंद्रीय स्तरावरील 'जेईई' परीक्षेच्या धर्तीवर राज्यातील विद्यार्थ्यांनाही दोन संधी मिळाव्यात, यासाठी उच्च व तंत्रशिक्षण मंत्री चंद्रकांत पाटील यांच्या निर्देशानुसार या वर्षापासून प्रथमच एमएचटी सीईटी (पीसीएम व पीसीबी समूह) आणि एमबीए/एमएमएस या परीक्षा दोनदा घेण्याचा निर्णय घेण्यात आला होता. या दोन्ही परीक्षांपैकी ज्या परीक्षेमध्ये जास्त पर्सेंटाईल असतील, तोच निकाल प्रवेशासाठी ग्राह्य धरला जाणार आहे. या निकालासह सीईटी कक्षाने आतापर्यंत विविध परीक्षांचे १९ निकाल जाहीर केले आहेत. सदर निकाल उमेदवारांच्या लॉगीन आयडीमध्ये उपलब्ध करून देण्यात आला असून, या अभ्यासक्रमांची केंद्रीय सामाईक प्रवेश प्रक्रिया (CAP Round) लवकरच सुरू केली जाईल, अशी माहिती सीईटी कक्षाकडून देण्यात आली आहे.

विद्यार्थिनींची उपस्थिती सर्वाधिक

  • परीक्षा दिनांक: १० व ११ मे २०२६ (४ सत्रांत संगणकाधारित CBT पद्धतीने)

  • एकूण नोंदणी: १ लाख १६ हजार ५४० विद्यार्थी

  • प्रत्यक्ष उपस्थिती: ९५ हजार ६३१ विद्यार्थी (८२.०६%)

  • वर्गीकरण: ३५ हजार ३४५ विद्यार्थी, ६० हजार २८५ विद्यार्थिनी आणि १ तृतीयपंथीय उमेदवार. (विद्यार्थ्यांपेक्षा विद्यार्थिनींची संख्या लक्षणीय आहे.)

  • केंद्रे: राज्यातील ३६ जिल्ह्यांतील १८४ परीक्षा केंद्रांवर ही परीक्षा पार पडली. यावर्षी महाराष्ट्राबाहेर एकही केंद्र नव्हते, मात्र राज्याबाहेरील ६४८ विद्यार्थ्यांनी महाराष्ट्रात येऊन ही परीक्षा दिली.

'१०० पर्सेंटाईल' मिळवणारे विद्यार्थी 

१. झील हितेश छेडा (पालघर) - खुला प्रवर्ग (विशेष म्हणजे झीलने दोन्ही संधींमध्ये १०० पर्सेंटाईल मिळवण्याचा पराक्रम केला आहे!)

२. मोहनीश मारुती भोसले (पुणे) - खुला प्रवर्ग

३. मुस्कान मुकेश नाथानी (छत्रपती संभाजीनगर) - खुला प्रवर्ग

४. रौश्मीत गुप्ता (मुंबई शहर) - खुला प्रवर्ग

दोन्ही संधींमध्ये सर्वोच्च यश मिळवणारे इतर विद्यार्थी

  • साहीम साकिब पटवेगर (कोल्हापूर): पहिल्या संधीत १०० तर दुसऱ्या संधीत ९९.९९ पर्सेंटाईल मिळवून ओबीसी (OBC) प्रवर्गात राज्यात सर्वोच्च स्थान.

  • गिरीश मंगलसिंग गोठवाल (जळगाव): पहिल्या संधीत ९९.९७ तर दुसऱ्या संधीत ९९.९८ पर्सेंटाईल मिळवून डीटी/व्हिजे (DT/VJ) प्रवर्गात राज्यात सर्वोच्च स्थान.

प्रवर्गनिहाय सर्वोच्च पर्सेंटाईल मिळवणारे विद्यार्थी:

अ. क्र. प्रवर्ग विद्यार्थ्याचे नाव जिल्हा पर्सेंटाईल
१ खुला प्रवर्ग (Open) झील छेडा, मोहनीश भोसले, मुस्कान नाथानी, रौश्मीत गुप्ता पालघर, पुणे, छ. संभाजीनगर, मुंबई १००
२ एससी (SC) संदेश ज्ञानेश्वर खडसे अकोला ९९.९६
३ एसटी (ST) अर्जुन सुधीर पेंदोर रायगड ९९.९५
४ ओबीसी (OBC) साहीम साकिब पटवेगर कोल्हापूर ९९.९९
५ एसबीसी (SBC) मुचापथी रानेश पुणे ९९.९९
६ एसइबीसी (SEBC) निलभ शरद कदम सांगली ९९.९९
७ डीटी/ व्हिजे (DT/VJ) गिरीश मंगलसिंग गोठवाल जळगाव ९९.९८
८ एनटी १ बी (NT1 B) श्रद्धा संतोष हिवरकर बुलढाणा ९९.८७
९ एनटी २ सी (NT2 C) ओम सुरेश बिचकुले सोलापूर ९९.९६
१० एनटी ३ डी (NT3 D) देवानंद उद्धव चाटे नांदेड ९९.९४