बीएड-एमएड व एमएड कॅपसाठी प्रवेश नोंदणी सुरु

एज्युवार्ता न्यूज नेटवर्क 

महाराष्ट्र राज्य सामाईक प्रवेश परीक्षा (सीईटी) कक्षातर्फे शैक्षणिक वर्ष २०२६-२७ साठी घेण्यात आलेल्या बीएड-एमएड (३ वर्षीय एकात्मिक अभ्यासक्रम) आणि मास्टर ऑफ एज्युकेशन (एमएड) या अभ्यासक्रमांच्या सेंट्रलाईज प्रवेश प्रक्रियेसाठी ऑनलाइन नोंदणीला १६ जूनपासून सुरुवात झाली आहे. या प्रवेश प्रक्रियेसाठी अर्ज करण्यास येत्या ६ जुलै पर्यंत मुदत देण्यात आली आहे.

नोंदणी करताना विद्यार्थ्यांनी पासपोर्ट आकाराचे रंगीत छायाचित्र आणि स्वाक्षरीची प्रतिमा (सिग्नेचर इमेज) निश्चित आकारमानात जेपीजी/जेपीईजी स्वरूपात स्कॅन करून अपलोड करणे आवश्यक आहे. तसेच शैक्षणिक व इतर आवश्यक कागदपत्रे निश्चित आकारमानात पीडीएफ स्वरूपात स्कॅन करून अपलोड करावीत. आवश्यक कागदपत्रांची सविस्तर यादी सीईटी कक्षाच्या संकेतस्थळावर उपलब्ध करून देण्यात आली आहे.

सीईटी कक्षाने बीएड-एमएड (३ वर्षीय एकात्मिक अभ्यासक्रम) प्रवेशासाठीची सीईटी परीक्षा ९ एप्रिल २०२६ रोजी घेतली होती. या परीक्षेला ७९७ विद्यार्थ्यांनी हजेरी लावली होती. तर एमएड अभ्यासक्रमासाठीची सीईटी परीक्षा २५ मार्च २०२६ रोजी पार पडली. या परीक्षेला ३ हजार ४५१ विद्यार्थ्यांनी सहभाग नोंदविला होता. या दोन्ही अभ्यासक्रमांच्या सीईटी परीक्षांचे निकाल १९ मे २०२६ रोजी जाहीर करण्यात आले आहेत. प्रवेश प्रक्रियेबाबतची अद्ययावत माहिती विद्यार्थ्यांनी सीईटी कक्षाच्या अधिकृत संकेतस्थळावरून नियमितपणे तपासावी, असेही कक्षाकडून सांगण्यात आले आहे.