FDA कडून विद्यापीठातील रिफेक्ट्रीचा परवाना निलंबित: अस्वच्छता, अन्न सुरक्षेच्या नियमांना फासला हरताळ

एज्युवार्ता न्यूज नेटवर्क 

निकृष्ट दर्जाचे अन्न, जेवणात सापडणाऱ्या अळ्या अशा विद्यार्थ्यांच्या वारंवार तक्रारी समोर आल्यानंतर सावित्रीबाई फुले पुणे विद्यापीठाच्या रिफेक्ट्रीची (मेस) अन्न व औषध प्रशासनाने (एफडीए) तपासणी केली.एफडीएने या कारवाईत अस्वच्छता आणि अन्न सुरक्षेतील गंभीर त्रुटीमुळे विद्यापीठाच्या रिफेक्ट्रीचा परवाना निलंबित केला आहे. विद्यापीठातील अधिकारी यांनी या वृत्तास दुजोरा दिला आहे.

मे.श्री स्वामी समर्थ भोजनालय अँड कॅटरिंग सर्व्हिसेस यांना विद्यापीठातील रिफेक्ट्री चालवण्यास दिली आहे. मात्र, अस्वच्छता आणि अन्न सुरक्षेला बाधा निर्माण होईल, अशी अनियमितता आढळून आली. रिफेक्ट्रीची तपासणी केली असता अन्न साठवणूक, तापमान नियंत्रण आणि अन्न हाताळण्याच्या प्रक्रियेतील गंभीर त्रुटी समोर आले.

कच्चे आणि शिजवलेले अन्न वेगळे ठेवण्याबाबत खबरदारी घेतली जात नसल्याचे निदर्शनास आले. त्याचप्रमाणे कीटक प्रतिबंधक उपाययोजनांचा आभाव आणि अपुरी स्वच्छता, अन्न हाताळणाऱ्या कर्मचाऱ्यांचे वैद्यकीय तपासणीचे नोंदवही अभिलेखे नसणे, अशा अनेक बाबी उघडकीस आल्या. त्यामुळे पुढील आदेशापर्यंत मेस चालकाचा परवाना निलंबित करण्यात आला आहे.

गॅस तुटवड्यानंतर कमी अन्नपदार्थ देणे, अन्नामध्ये अळ्या झुरळ आढळणे, विद्यार्थ्यांचे उद्धटपणे संवाद साधने, अशा अनेक तक्रारी विद्यार्थ्यांकडून विद्यापीठ प्रशासनाकडे यापूर्वी करण्यात आल्या होत्या. मात्र त्यात फारशा सुधारणा होत नव्हत्या. मात्र आता अन्न व औषध प्रशासनाने याबाबत कारवाई केल्यामुळे विद्यापीठातील रिफेक्ट्रीच्या अन्नाच्या दर्जामध्ये सुधारणा होईल,अशी अपेक्षा व्यक्त केली जात आहे.

विद्यापीठातील विद्यार्थ्यांसह कर्मचारी व बाहेरून येणारे नागरिक विद्यापीठातील रिफेक्ट्रीतील अन्नपदार्थ खातात. या कारवाईमुळे सकस अन्नपदार्थांबरोबरच स्वच्छता व अन्नसुरक्षेच्या नियमांचे पालन होईल, अशी चर्चा विद्यापीठ वर्तुळात विद्यार्थ्यांमध्ये सुरू झाली आहे.