शिष्यवृत्तीचे प्रलंबित अर्ज 30 नोव्हेंबरपर्यंत सादर करण्यास मुदत 

एज्युवार्ता न्यूज नेटवर्क 

केंद्र सरकारच्या मॅट्रिकोत्तर शिष्यवृत्ती योजना (Post-Matric Scholarship Scheme) व शिक्षण शुल्क, परीक्षा शुल्क प्रतिपूर्ती योजनेंतर्गत स्वयंचलितरीत्या नामंजूर (ऑटो रिजेक्ट) झालेले प्रलंबित शिष्यवृत्ती अर्ज निकाली (Pending scholarship applications resolved) काढण्यास राज्य सरकारने मंजूरी दिली आली आहे. त्यानुसार महाविद्यालयांनी ३० नोव्हेंबरपर्यंत ऑफलाइन अर्ज (Offline application till November 30) व प्रस्ताव सहायक आयुक्त, समाज कल्याण कार्यालयाकडे सादर करावेत, असे आवाहन करण्यात आले आहे.

सामाजिक न्याय व विशेष साहाय्य विभागामार्फत राबविण्यात येत असलेल्या विविध शिष्यवृत्ती योजनेंतर्गत २०१८-१९ ते २०२३-२४ या कालावधीत महाडीबीटीप्रणालीमार्फत अर्ज करताना आलेल्या विविध अडचणीमुळे अनेक विद्यार्थ्यांचे अर्ज विहित मुदतीत भरूनदेखील ऑटो रिजेक्ट झाले आहेत. एखाद्या वर्षी विद्यार्थ्यांच्या नियमित परीक्षा अथवा पुरवणी परीक्षेचा निकाल विहित वेळेत न लागल्याने अर्ज भरता न येणे अथवा अर्ज भरूनही पुढच्या वर्षीचा अर्ज नूतनीकरण करण्यास अडचण आल्या.

अशा अडचणींमुळे पात्र विद्यार्थ्यांना शिष्यवृत्तीचा लाभ देता येत नसल्याची बाब विचारात घेऊन, अनुसूचित जाती प्रवर्गातील विद्यार्थ्यांचे या योजनेंतर्गत प्रलंबित अर्ज निकाली काढण्याबाबत कार्यपद्धती लागू करण्यात आली आहे. या योजनेच्या लाभापासून अनुसूचित जाती प्रवर्गातील एकही पात्र विद्यार्थी वंचित राहू नयेत, अशा विद्यार्थ्यांच्या ऑफलाइन अर्जावर महाविद्यालयांनी तातडीने कार्यवाही करावी, असे निर्देश समाज कल्याण विभागाने दिले आहेत.