सीबीएसई बोर्ड : १०वी, १२वी परीक्षेसाठी नोंदणी प्रक्रिया सुरू, ३० सप्टेंबरपर्यंत मुदत

एज्युवार्ता न्यूज नेटवर्क

केंद्रीय माध्यमिक शिक्षण मंडळात (सीबीएसई)  शिक्षण घेणारे विद्यार्थी आणि त्यांच्या पालकांसाठी महत्त्वाची बातमी समोर आली आहे. केंद्रीय माध्यमिक शिक्षण मंडळाने इयत्ता १०वी आणि १२वीच्या २०२६ च्या बोर्ड परीक्षांसाठी (10th and 12th board exams 2026) अर्ज नोंदणी प्रक्रिया सुरू केली आहे. त्यासाठी शाळांना उमेदवारांची यादी (एलओसी) सादर करण्याची मुदत ३० सप्टेंबर २०२५ (Deadline September 30) या तारखेपर्यंत देण्यात आली आहे. जर ही प्रक्रिया वेळेत पूर्ण झाली नाही, विलंब शुल्क आकारले जाणार आहे. 

विलंब शुल्कासह अर्ज नोंदणी करण्यासाठी ३ ऑक्टोबर ते ११ ऑक्टोबर २०२५ हा कालावधीत देण्यात आला आहे. तसेच चलनाद्वारे शुल्क भरण्याची शेवटची तारीख २२ सप्टेंबर निश्चित करण्यात आली आहे. विशेष गरजा असलेल्या विद्यार्थ्यांसाठी (सीडब्ल्यूएसएन) यंदा स्वतंत्र वेब पोर्टल उपलब्ध करून देण्यात आले आहे. या पोर्टलवर ९ सप्टेंबर ते २२ सप्टेंबर २०२५ पर्यंत विनाशुल्क अर्ज करता येतील, तर ३ ऑक्टोबर ते ८ ऑक्टोबर २०२५ दरम्यान विलंब शुल्कासह अर्ज करता येतील.

खासगी उमेदवारांनाही ९ ते ३० सप्टेंबर २०२५ दरम्यान अर्ज करता येतील. उशीर झाल्यास ३ ऑक्टोबर ते ११ ऑक्टोबर २०२५ यादरम्यान विलंब शुल्कासह अर्जी करण्याची संधी दिली जाईल. सीबीएसईने स्पष्ट केले आहे की, एकदा अर्ज सादर केल्यानंतर विषय बदल, श्रेणी बदल किंवा दुरुस्ती स्वीकारली जाणार नाही. तसेच चुकीची किंवा अपूर्ण माहिती मान्य केली जाणार नाही, अशी अधिकृत माहिती देण्यात आली आहे.