'माझी शाळा, सुंदर शाळा' पुरस्कार प्रदान सोहळा मुख्यमंत्री शिंदे यांच्या उपस्थितीत संपन्न 

एज्युवार्ता न्यूज नेटवर्क 

महाराष्ट्र शासनाने राबवलेल्या ‘मुख्यमंत्री माझी शाळा, सुंदर शाळा’ (My school, beautiful school) या अभियानातील दुसर्‍या टप्प्यात (second phase) आदर्श प्राथमिक शाळा धानोरे जिल्हा पुणे येथील शाळेने राज्यात पहिला नंबर पटकावला. तर नवी मुंबई येथील राजश्री शाहू महाराज विद्यालय या शाळेने द्वितीय आणि गडचिरोली येथील जवाहरलाल नेहरू उच्च माध्यमिक शाळेने तृतीय क्रमांक पटकावला आहे. त्यानंतर शाळांचा गौरव पुरस्कार प्रदान सोहळा (Gaurav Award Ceremony) राज्याचे मुख्यमंत्री एकनाथ शिंदे (CM Eknath Shinde) आणि शालेय शिक्षण मंत्री दीपक केसरकर (Deepak Kesarkar) यांच्या प्रमुख उपस्थितीत पार पडला.  

शासन विविध योजनांच्या माध्यमातून शाळांमध्ये बदल घडवित असून त्यांचा दर्जा सुधारत आहे. मुलांना जीवनाशी निगडित बाबी शिकविण्याचा प्रयत्न केला जातोय. ‘मुख्यमंत्री माझी शाळा, सुंदर शाळा’ अभियानाच्या दुसऱ्या टप्प्याला देखील मोठा प्रतिसाद मिळाला असून या अभियानातून विद्यार्थीपूरक बदल घडत आहेत. शाळांचा दर्जा सर्वोत्तम राखण्यास प्राधान्य दिले असल्याचे मुख्यमंत्री एकनाथ शिंदे यांनी सांगितले.

व्यक्तिमत्व विकासास चालना देणारे मुख्यमंत्री माझी शाळा, सुंदर शाळा अभियानाच्या दुसऱ्या टप्प्यातील विजेत्या शाळांना प्रमाणपत्र, स्मृतीचिन्ह आणि धनादेश देऊन सन्मानित करण्यात आले. यावेळी मुख्यमंत्र्यांनी या अभियानाच्या दुसऱ्या टप्प्यातील विजेत्या शाळांचे अभिनंदन केले. यावेळी शालेय शिक्षण मंत्री दीपक केसरकर, प्रधान सचिव आय.ए.कुंदन, शालेय शिक्षण आयुक्त सूरज मांढरे यांच्यासह आदी मान्यवर उपस्थित होते.

शाळा हा आपल्या आयुष्यातील हळुवार कोपरा असतो. शाळा आणि शिक्षक विद्यार्थ्यांवर संस्कार करतात. शाळा ही आयुष्यातील ज्ञान मंदिर असते. शाळा विद्यार्थ्यांचे आयुष्य आणि देश घडवते. आईवडील जन्म देतात तर शिक्षक हे आयुष्य घडवतात. विद्यार्थ्यांना सुजाण नागरिक घडवण्यासाठी मोठे योगदान देतात. त्यामुळे गुरूजनांचे महत्व अनन्यसाधारण असल्याचे यावेळी मुख्यमंत्री शिंदे म्हणाले. 

पुरस्काराचे स्वरुप

राज्य स्तरावर प्रथम क्रमांक मिळविलेल्या शाळेला 51 लाख रुपये, द्वितीय क्रमांक मिळविलेल्या शाळेला 31 लाख तर तृतीय क्रमांक मिळविलेल्या शाळेला 21 लाख रुपयांची रोख रक्कम दिली जाते. विभागीय स्तरावर प्रथम क्रमांक मिळविलेल्या शाळेला 21 लाख, द्वितीय क्रमांक मिळविलेल्या शाळेला 15 लाख तर तृतीय क्रमांक मिळविलेल्या शाळेला 11 लाख रुपये. जिल्हा स्तरावर प्रथम क्रमांक मिळवलेल्या शाळेला 11 लाख, द्वितीय क्रमांकास 5 लाख तर तृतीय क्रमांक मिळविलेल्या शाळेला 3 लाख रुपये. त्याचप्रमाणे तालुका स्तरावर प्रथम क्रमांक मिसळविलेल्या शाळेला 3 लाख, द्वितीय क्रमांकासाठी 2 लाख आणि तृतीय क्रमांक मिळविलेल्या शाळेला 1 लाख रुपयांचे पारितोषिक तसेच प्रमाणपत्र आणि स्मृतीचिन्ह दिले जाते.