MPSC : परीक्षेपूर्वी प्रश्नपत्रिका व अन्सर की देण्याचे आमिष दाखवणारे आरोपी जेरबंद
२ फेब्रुवारी घेतल्या गेलेल्या महाराष्ट्र गट ब संयुक्त पूर्व परिक्षेची प्रश्नपत्रिका उपलब्ध करून देण्याचे आमिष दाखवत ४० लाखांची मागणीचे कॉल रेकॉर्डिंग व्हायरल झाले होते. पुणे पोलिसांनी याची दखल घेत चाकणमधून दोघांना तर नागपूरमधून दोघांना जेरबंद करण्यात आले आहे.
eduvarta@gmail.com 
एज्युवार्ता न्यूज नेटवर्क
महाराष्ट्र लोकसेवा आयोगाकडून (Maharashtra Public Service Commission) रविवारी २ फेब्रुवारी घेतल्या गेलेल्या महाराष्ट्र गट ब संयुक्त पूर्व परिक्षेची (Maharashtra Group B Combined Preliminary Exam) प्रश्नपत्रिका उपलब्ध करून देण्याचे आमिष दाखवत ४० लाखांची मागणीचे कॉल रेकॉर्डिंग व्हायरल झाले होते. पुणे पोलिसांनी याची दखल घेत चाकणमधून दोघांना तर नागपूरमधून दोघांना जेरबंद करण्यात आले आहे. दोन दिवसांपुर्वी हे कॉल रेकॉर्डींग व्हायरल झाल्यानंतर विद्यार्थी व पालकांमध्ये चिंतेचे वातावरण होते. मात्र, परीक्षेचा पेपर फुटला नसून, विद्यार्थ्यांनी काळजी न करता परीक्षेला सामोरे जावे, असे आवाहन केले होते. त्यानुसार, रविवारी पेपर सुरळीत पार पडला.
दिपक दयाराम गायधने (वय २६ वर्षे, चाकण, मूळ. रा. तुमसर जि. भंडारा), सुमित कैलास जाधव (वय २३, चाकण, मुळ रा. नांदगाव, जि.नाशिक) अशी अटक केलेल्यांची नावे आहेत. तर, त्यांचा साथीदार योगेश सुरेंद्र वाघमारे (रा,सोनाली ता. वराठी, जि.भंडारा) याच्यासह दोघांना ताब्यात घेतले आहे.
रविवारी २ फेब्रुवारी रोजी एमपीएससी गट ब (अराजपत्रीत) संयुक्त पुर्व परिक्षा सुरळीत पार पडली. मात्र, दोन दिवसांपासून या परीक्षेची प्रश्नपत्रिका उत्तरपत्रिकेसह दिली जाईल. त्यासाठी ४० लाख रुपये द्यावे लागतील, असे कॉल रेकॉर्डींग सोशल मिडीयावर व्हायरल झाले होते. पुण्यातील एका विद्यार्थ्यालाही फोन आला होता. तसेच एमपीएससी आयोगाकडेही काही विद्यार्थ्यांनी यासंदंर्भात ईमेलव्दारे तक्रारी केल्या होत्या. या पार्श्वभूमीवर आयोगाने पुणे पोलिसांना तक्रार केली होती. पोलीस आयुक्त अमितेश कुमार व गुन्हे शाखेचे अप्पर आयुक्त शैलेश बलकवडे यांनी गांर्भियाने दखल घेत तपासाच्या सूचना केल्या होत्या.
तांत्रिक तपासावरून पोलिसांनी काही तासांतच गायधने आणि जाधव यांना चाकण येथून पकडले. चौकशीत त्यांनी काही विद्यार्थ्यांना फोन केल्याचे कबूल केले. त्यादृष्टीने दोघांना अटक केली. दोघेही चाकण येथील एका कंपनीत टेक्निशन म्हणून कामाला आहेत. त्यांच्याकडे केलेल्या चौकशीत वाघमारेची माहिती मिळाली. वाघमारेने नाशिक येथील 24 उमेदवारांची यादी दोन आरोपींना दिली होती. यादीतील नाशिक जिल्ह्यातील नांदगावमधील दोन विद्यार्थ्यांना फोन कॉलही केले होते. त्यानूसार पुणे पोलिसांनी नागपूर येथून वाघमारेला ताब्यात घेतले. दरम्यान, चाकणमधील दोघांनी चार ते पाच विद्यार्थ्यांना फोन केल्याचे प्राथमिक तपासात समोर आले आहे. तर, इतर जिल्ह्यातील विद्यार्थ्यांनाही असे फोन केल्याची शक्यता आहे.
