UPSC मधील अनियमिततेची सखोल चौकशी व्हावी; शेर्पा अमिताभ कांत यांची मागणी
"UPSC द्वारे सर्वोच्च नागरी सेवांमध्ये प्रवेशासाठी फसवणुकीची अनेक प्रकरणे समोर येत आहेत. अशा सर्व प्रकरणांची सखोल चौकशी करून कठोर कारवाई करण्यात यावी."
eduvarta@gmail.com 
एज्युवार्ता न्यूज नेटवर्क
प्रशिक्षणार्थी IAS पूजा खेडकर (IAS Pooja Khedkar) वादानंतर, केंद्रीय लोकसेवा आयोग (UPSC) मधील प्रक्रियेतील फसवणूक आणि अनियमिततेची सखोल चौकशी व्हावी, अशी मागणी NITI आयोगाचे माजी मुख्य कार्यकारी आणि G20 चे शेर्पा अमिताभ कांत (G20 Sherpa Amitabh Kant)यांनी केली आहे.
कांत यांनी देशातील सर्वात प्रतिष्ठित परीक्षांपैकी एक असलेल्या UPSC परीक्षेतील फसवणूक प्रकरणाची चौकशी आणि कठोर कारवाईची मागणी केली आहे. त्यांनी आपल्या सोशल मीडिया अकाऊंट 'X' वर एका पोस्टमध्ये लिहिले की, "UPSC द्वारे सर्वोच्च नागरी सेवांमध्ये प्रवेशासाठी फसवणुकीची अनेक प्रकरणे समोर येत आहेत. अशा सर्व प्रकरणांची सखोल चौकशी करून कठोर कारवाई करण्यात यावी."
शेर्पा अमिताभ कांत यांनी आपल्या पोस्टमध्ये निवड ही गुणवत्ता आणि प्रामाणिकपणावर आधारित असावी यावर भर दिला. SC/ST आणि OBC आरक्षणांना पाठिंबा दर्शवत, कांत यांनी शारीरिक आणि मानसिकदृष्ट्या अपंगांसाठी विद्यमान आरक्षण आणि नागरी सेवांमध्ये तृतीय लिंगांसाठी प्रस्तावित 1% आरक्षणाचे पुनरावलोकन करण्याची मागणी केली. ते म्हणाले, "प्रतिष्ठित परीक्षांमध्ये अन्यायकारक फायदा मिळवण्यासाठी या आरक्षणांचा गैरवापर केला जात आहे. SC/ST किंवा OBC आरक्षण चालू ठेवावे, सोबतच क्रिमी लेयरचे नियम लागू केले जावेत."
दरम्यान, बनावट प्रमाणपत्र प्रकरणी तपासानंतर यूपीएससीने पूजा खेडकर विरोधात दिल्ली पोलिसांच्या गुन्हे शाखेत एफआयआर दाखल केला आहे. यासोबतच तुमची उमेदवारी रद्द का करू नये आणि आगामी यूपीएससी परीक्षेत बसण्यापासून का रोखले जाऊ नये, अशी कारणे दाखवा नोटीस बजावली आहे. पूजा खेडकर यांच्या नियुक्तीबाबत यूपीएससीच्या निवड प्रक्रियेवर प्रश्न उपस्थित केले जात आहेत.
