कॅरी-फाॅरवर्ड पद्धतीने विद्यार्थ्यांना मिळणार प्रवेश; गोंडवाना विद्यापीठाचा निर्णय 

एज्युवार्ता न्यूज नेटवर्क

गोंडवाना विद्यापीठ (University of Gondwana) संलग्न महाविद्यालयातील विद्यार्थ्यांना यंदा प्रथमच कॅरी-फॉरवर्ड पद्धतीने (Carry-forward method) प्रवेश मिळणार आहे. हजारो विद्यार्थ्यांना याचा लाभ मिळणार असून, विद्यार्थ्यांचे शैक्षणिक नुकसान टळणार आहे. विद्यार्थ्यांचे शैक्षणिक नुकसान टाळण्यासाठी कॅरिऑन पद्धतीने प्रवेश द्यावा, यासंदर्भात सिनेट सदस्यांनी (Statement by the members of the Senate) कुलगुरुंना निवेदन दिले होते. त्यांच्या मागणीनंतर विद्यापीठ प्रशासनाने कॅरी-फाॅरवर्ड पद्धतीने प्रवेश देण्याचा निर्णय घेतला आहे. 

चंद्रपूर आणि गडचिरोली जिल्ह्यातील अनेक महाविद्यालय गोंडवाना विद्यापीठाशी संलग्न आहेत. या महाविद्यालयात शिक्षण घेणाऱ्या काही विद्यार्थ्यांचे पहिल्या वर्षातील काही विषय शिल्लक आहे. मात्र, विद्यार्थी द्वितीय वर्षात उत्तीर्ण झाले आहे. पहिल्या वर्षातील काही विषयांमुळे त्यांना द्वितीय वर्ष उत्तीर्ण होऊनही तृतीय वर्षात प्रवेश दिला जात नव्हता. मात्र, आता परीक्षा व मूल्यमापन मंडळाचे प्रभारी संचालक डॉ. विजय खंडारे यांनी अधिसूचना काढली असून, यामुळे हजारो विद्यार्थ्यांचे शैक्षणिक नुकसान टळणार आहे. विशेष म्हणजे, ही सवलत २०२४-२५ या शैक्षणिक वर्षाकरिता लागू असल्याचेही अधिसूचनेमध्ये म्हटले आहे.

चंद्रपूर येथील शासकीय महाविद्यालयातील द्वितीय वर्षाच्या विद्यार्थ्यांबाबतही असेच घडले होते. त्यांचे शैक्षणिक भवितव्य अंधारात येण्याची शक्यता होती. विद्यार्थ्यांच्या भविष्याचा विचार करून विद्यार्थ्यांना कॅरिऑन देण्याची मागणी सिनेट सदस्याकडून कुलगुरूंकडे करण्यात आली होती. आता विद्यापीठाने निर्णय घेतल्यामुळे हजारो विद्यार्थ्यांचे शैक्षणिक नुकसान टळणार आहे. विद्यार्थ्यांना कॅरी-फॉरवर्ड पद्धतीने प्रवेश मिळणार आहे.