विद्यापीठाकडून शुल्क जाहीर : M.Sc कॉम्प्यूटर सायन्स 70 हजार; MCA 85 हजार 

एज्युवार्ता न्यूज नेटवर्क 

सावित्रीबाई फुले पुणे विद्यापीठातर्फे (Savitribai Phule Pune University)विद्यापीठातील विविध विभाग,संलग्न महाविद्यालयातील अभ्यासक्रम (Courses in Affiliated Colleges) तसेच मुक्त व दूरस्त अध्ययन प्रशाळेच्या (School of Open Learning) नव्या अभ्यासक्रमाचे शुल्क जाहीर करण्यात आले आहे. विद्यापीठाने विविध विनाअनुदानित अभ्यासक्रमांसाठी शुल्क (Fees for Unaided Courses)निश्चिती केले असून 2024-25 या शैक्षणिक वर्षापासून हे शुल्क लागू असणार आहे,असे परिपत्रक विद्यापीठाने प्रसिद्ध केले आहे.

स्वामी रामानंद तीर्थ मराठवाडा विद्यापीठाचे माजी कुलगुरू डॉ.पंडित  विद्यासागर यांच्या अध्यक्षतेखाली स्थापन करण्यात आलेल्या समितीने विविध अभ्यासक्रमाच्या शुल्काबाबत शिफारस केली होती. त्यानुसार विद्यापीठातील विविध विभाग व संलग्न महाविद्यालय आणि शैक्षणिक संस्थांमध्ये नव्याने सुरू होणाऱ्या अभ्यासक्रमाचे शुल्क निश्चित करण्यात आले आहे. विज्ञान व तंत्रज्ञान विद्याशाखा, वाणिज्य व व्यवस्थापन विद्याशाखा,  मानव्य विज्ञान विद्याशाखा आदी विद्याशाखेच्या  अभ्यासक्रमाचे शुल्क जाहीर करण्यात आले आहे.

विद्यापीठातील विज्ञान व तंत्रज्ञान विद्याशाखेशी संबंधित विनाअनुदानित एम.एससी.कॉम्प्यूटर सायन्स (विनाअनुदानित) अभ्यासक्रमाची ट्युशन फी 40 हजार रुपये तर या अभ्यासक्रमाची लॅबोरेटरी फी 35 हजार रुपये असणार आहे. मास्टर ऑफ कॉम्प्यूटर एप्लीकेशन MCA (विनाअनुदानित)अभ्यासक्रमाची ट्युशन फी 50 हजार रुपये तर लॅबोरेटरी फी 35 हजार रुपये असेल. नाशिक येथील उपकेंद्रात मधील बीबीए अभ्यासक्रमाचे शुल्क 30 हजार 250 रुपये तर लॅबोरेटरी फी 5 हजार रुपये असेल.

फाउंडेशन कोर्स इन योगा एज्युकेशन, फाउंडेशन कोर्स इन्स्ट्रक्टर अँड मॅनेजमेंट , फाउंडेशन कोर्स इन फिटनेस अँड स्पोर्ट्स न्यूट्रिशन फाउंडेशन कोर्स इन इंडिया एप्लीकेशन इन स्पोर्ट्स या सर्व अभ्यासक्रमाचे शुल्क प्रत्येकी 20 हजार रुपये असणार आहे.तसेच विद्यापीठाशी संलग्न महाविद्यालयांमधील विनाअनुदानित बीएस्सी कम्प्युटर एप्लीकेशन अभ्यासक्रमाची फी 16 हजार 900 रुपये तर लॅबोरेटरी फी 12 हजार 500 असेल, बॅचलर ऑफ कॉमर्स इन बिझनेस मॅनेजमेंट बीकॉम अभ्यासक्रमाचे शुल्क 18  हजार 600 , बॅचलर ऑफ कॉमर्स इन कम्प्युटर एप्लीकेशन बीकॉम अभ्यासक्रमाचे शुल्क 16 हजार 900 रुपये आणि लॅबोरेटरी 12 हजार 500 असेल.बॅचलर ऑफ कॉमर्स इन इंटरनॅशनल बिजनेस बी कॉम अभ्यासक्रमाची फी  18 हजार 600 रुपये असेल,असे विद्यापीठातर्फे स्पष्ट करण्यात आले आहे.
-------------------------------------------

विद्यापीठाच्या मुक्त व दूरस्त अध्ययन प्रशाळेमार्फत 24-25 या शैक्षणिक वर्षांपासून पोस्ट ग्रॅज्युएट डिप्लोमा इन हायर एजुकेशन (PGDHE) हा नवीन अभ्यासक्रम सुरू होत असून त्यासाठी 10 हजार 350 रुपये शुल्क आकारले जाणार आहे,असेही विद्यापीठातर्फे स्पष्ट करण्यात आले आहे.

विद्यापीठाने जाहीर केलेले शुल्काचे परिपत्रक : http://sppudocs.unipune.ac.in/sites/news_events/Lists/News%20and%20Announcements/Attachments/9116/V.C.%20Order-%20PGS-3737_23112024.pdf