EDUVARTA IMPACT : प्राध्यापक पदाचा अर्ज ऑनलाईन केला उपलब्ध; उमेदवारांना दिलासा
शासन मान्यतेने राज्यातील काही महाविद्यालयांमध्ये अनुदानित पदांची भरती प्रक्रिया राबवली जात आहे. अनेक वर्षांनंतर प्राध्यापक भरती होत असल्याने उमेदवार अनुदानित पदावर नोकरी मिळावी, यासाठी प्रयत्न करत आहेत.
eduvarta@gmail.com 
एज्युवार्ता न्यूज नेटवर्क
प्राध्यापक पदासाठी (Professor Recruitment) केवळ ऑफलाईन अर्ज उपलब्ध करून देणाऱ्या कोल्हापूर येथील श्री स्वामी विवेकानंद शिक्षण संस्थेने (Shri Swami Vivekanand Shikshan Sanstha) प्राचार्य व प्राध्यापक पदासाठी अखेर ऑनलाईन अर्ज उपलब्ध करून दिले आहेत. त्यामुळे अनेक उमेदवारांचा कोल्हापूरला (Kolhapur) जाण्याचा त्रास वाचला आहे. 'एज्युवार्ता'ने या संदर्भातील वृत्त प्रसिध्द केले होते. त्यानंतर संस्थेने आपल्या संकेतस्थळावर अर्जाची पीडीएफ प्रत अपलोड केली आहे.
शासन मान्यतेने राज्यातील काही महाविद्यालयांमध्ये अनुदानित पदांची भरती प्रक्रिया राबवली जात आहे. अनेक वर्षांनंतर प्राध्यापक भरती होत असल्याने उमेदवार अनुदानित पदावर नोकरी मिळावी, यासाठी प्रयत्न करत आहेत. मात्र, श्री स्वामी विवेकानंद शिक्षण संस्थेने प्राचार्य व प्राध्यापक पदासाठी केवळ ऑफलाईन अर्ज उपलब्ध करून दिला होता. एकविसाव्या शतकात आणि मोठी डिजिटल क्रांती झालेली असताना ऑफलाईन अर्ज घेण्यासाठी संस्थेतच यावे लागेल, अशी आडमुठी भूमिका या शैक्षणिक संस्थेने घेतल्याने उमेदवारांकडून संताप व्यक्त केला जात आहे. त्यास 'एज्युवार्ता'ने वाचा फोडाली. त्यानंतर राज्याचे उच्च शिक्षण सहसंचालक डॉ. प्रकाश बच्छाव यांनी संस्थेच्या सचिवांशी संवाद साधून ऑनलाईन अर्ज उपलब्ध करून देण्याच्या सूचना दिल्या.
प्राध्यापक भरतीसाठी केवळ ऑफलाईन अर्ज ; उमेदवारांची पिळवणूक , ऑनलाईन अर्जाची मागणी
राज्यातील विविध शैक्षणिक संस्था व महाविद्यालयाकडून प्राध्यापक पदाच्या भरतीसाठी अर्ज मागवले जात असून त्यासाठी ५०० ते १००० रुपये आकारले जात आहेत. मात्र, बेरोजगार उमेदवारांसाठी ही रक्कम मोठी असल्याने अर्जाची किंमत वाजवी असावी आणि त्यात एक समानता असावी, अशी मागणी प्राध्यापक संघटनांकडून केली जात आहे. त्यात कोल्हापूर येथील श्री स्वामी विवेकानंद शिक्षण संस्थेने केवळ ऑफलाईन पद्धतीने अर्ज मिळेल. तसेच संस्थेच्या कार्यालयातून ५०० रुपायांमध्ये विकत मिळेल, असे जाहिरातीत नमूद केले. मात्र, केवळ अर्ज घेण्यासाठी आणि त्यानंतर मुलाखतीसाठी एवढ्या दूर जाणे परवडणारे नाही. त्यामुळे संस्थेने ऑनलाईन अर्ज उपलब्ध करून द्यावा, अशी मागणी उमेदवारांकडून केली जात होती.
कोल्हापूर येथील श्री स्वामी विवेकानंद शिक्षण संस्थेने एकूण ५८ पदांसाठी जाहिरात प्रसिध्द केली आहे. त्यात प्राचार्य पदापासून मराठी, राज्यशास्त्र, भौतिकशास्त्र, वनस्पतीशास्त्र, प्राणीशास्त्र, संख्याशास्त्र, वाणिज्य, कॉम्प्युटर सायन्स, इलेक्ट्रॉनिक्स, गणित, हिंदी, इतिहास,अर्थशास्त्र, भूगोल, रासायशास्त्र आदी विषयाच्या पदांचा समावेश आहे. त्यात २७ पदे खुल्या संवर्गांसाठी तर इतर पदे आरक्षित संवर्गांसाठी आहेत.
या पदांसाठी येत्या २० नोव्हेंबरपर्यंत सायंकाळी पाच वाजेपर्यंत पोस्टाने पाठवलेले अर्ज स्वीकारले जाणार आहेत. संस्थेने प्रसिध्द केलेल्या परिपत्रकानुसार https://www.vivekanandshikshansanstha.edu.in या संकेतस्थळावर अर्जाची पीएडीएफ प्रत उपलब्ध करून दिली आहे. तसेच प्रत्यक्ष मुलाखातीच्यावेळी संस्थेचा विहित नामुन्यातील अर्ज भरून द्यावा लागेल, असे संस्थेने प्रसिध्दी पत्रकात नमूद केले आहे.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
