दृष्य कला मंडळाच्या पदरी निराशा; मागणी विद्यापीठाची माथी मारले कला मंडळ

एज्युवार्ता न्यूज नेटवर्क 

महाराष्ट्राला दृश्य कलेचा ऐतिहासिक वारसा लाभलेला आहे. हा वारसा महाराष्ट्रातील अनेक पिढ्या जपत आलेल्या आहेत. तो अधिक मजबुतीने पुढे चालावा, या उद्देशाने राज्यात दृश्य कला विद्यापीठाची (University of Visual Arts) स्थापना व्हावी, ही मागणी गेल्या अनेक वर्षांपासून होत आहे. मात्र राज्य सरकारने या मागणीकडे दुर्लक्ष करून महाराष्ट्र कला मंडळ (Maharashtra Art Board) माथी मारले, असा आरोप महाराष्ट्र राज्य कला शिक्षण मंडळ (Maharashtra State Board of Art Education) हटाव कृती समिती आणि महाराष्ट्र राज्य दृश्य कला विद्यापीठ स्थापना कृती समितीने केला आहे.

कला मंडळ हटवून दृश्य कला विद्यापीठ स्थापन करण्याची मागणी लावून धरण्यासाठी राज्यातील ३१ शासकीय कला महाविद्यालये आणि १७० च्या वर खासगी महाविद्यालयांच्या संचालक, प्राध्यापकांनी संघर्षाची मोट बांधली. नवीन शैक्षणिक धोरणानुसार कला शिक्षण हे अनिवार्य करण्यात आले आहे. शिक्षणाचे नव नवीन प्रयोग होऊ पाहत आहेत. यात महाराष्ट्र अग्रेसर राहावा यासाठी सरकारने इच्छाशक्ती दाखवण्याची गरज आहे. सरकारने दृश्य कला विद्यापीठाची स्थापना करून सर्व कला शिक्षण एकाच छताखाली उपलब्ध करून द्यावे, अशी मागणी याद्वारे केली आहे.

मंडळांमुळे कला शिक्षणाचे अवमूल्यन

महाराष्ट्र शासन कला संचालनालयाच्या अखत्यारीतील सर्व अनुदानित व विनाअनुदानित कला महाविद्यालयांनी शैक्षणिक दर्जा वाढविण्यासाठी कोणतेही वैधानिक धोरण अवलंबले नाही. कलासंस्था, प्राचार्य, शिक्षकांच्या हरकती न घेता महाराष्ट्र राज्य कला शिक्षण मंडळ स्थापन केले. त्यात नव्या शैक्षणिक धोरणाचा व विद्यार्थ्यांच्या शैक्षणिक उन्नतीचा कोणताही मार्ग नाही. याउलट कला शिक्षण पदविका अभ्यासक्रम हे पदवी समकक्ष असताना ते कायमस्वरूपी पदविकाच कशी राहतील, याचा घाट घातल्याचा आरोप केला जात आहे.