"Couple for the Environment" डॉक्युमेंटरीला एनसीईआरटी तर्फे सर्वोत्तम शैक्षणिक कार्यक्रमाचा पुरस्कार

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University), ईएमएमआरसी (EMMRC) द्वारा निर्मित "Couple for the Environment" या डॉक्युमेंटरीला एनसीईआरटी (NCERT) तर्फे शिलाँग, मेघालय येथे झालेल्या पुरस्कार सोहळ्यात शासकीय संस्थांच्या श्रेणीतील सर्वोत्तम शैक्षणिक कार्यक्रमाचा पुरस्कार (Award for the best educational program) प्राप्त झाला आहे. या डॉक्युमेंटरीने पर्यावरण जागरूकतेसाठीची उत्कृष्ट मांडणी केली असून त्याला सन्मानाने गौरविण्यात आले आहे. 

"Couple for the Environment" हा कार्यक्रम पर्यावरण रक्षणासंबंधी जनजागृती करणारा असून, यामध्ये दोन व्यक्तींच्या माध्यमातून पर्यावरण जागृतीसाठी प्रभावीपणे कसे काम करता येते याचा लेखाजोगा मांडला आहे. रमेश खरमाळे आणि त्यांची पत्नी स्वाती, मागच्या अनेक वर्षांपासून जलसंवर्धनाचं आणि वृक्षारोपणाचं काम करत आहेत. २०२१ सालापासून त्यांनी डोंगर माथ्यावर जलशोषक चरांची निर्मिती सुरू केली आहे. यामुळे पावसाळ्यात करोडो लीटर पाणी जमिनीत मुरण्यास मदत झालीये. त्यांच्या या कार्याचे अनेक स्तरातून कौतुक होत असून अनेक पुरस्काराने त्यांना सन्मानित करण्यात आलंय.

या डॉक्युमेंटरीचे दिग्दर्शन मिलिंद पाटील यांनी केले आहे, आणि कॅमेरासाठी राम जाधव, तर ग्राफिक्स आणि एनिमेशन अमृता घोडे आणि सहाय्यक म्हणून फय्याज शेख, खंडू भोसले यांनी काम पहिले आहे.

पर्यावरण प्रेमी पती-पत्नी आणि त्यांच्या कार्यावरील या महितीपटामुळे समाजातील अनेकजण, खासकरून विद्यार्थिवर्ग आणि येणारी नवी पिढी पर्यावरण जागृती साठी प्रेरित होईल अशी आम्हास आशा वाटते. 

- डॉ माधवी रेड्डी - संचालक. ईएमएमआरसी, सावित्रीबाई फुले पुणे विद्यापीठ, पुणे.