हिंदी प्रेमी शिक्षणमंत्र्याना हिंदीचा एवढा पुळका का? युवासेना आक्रमक 

एज्युवार्ता न्यूज नेटवर्क 

राज्याचे शालेय शिक्षणमंत्री दादा भुसे (Education Minister Dada Bhuse) सीबीएसई पॅटर्न लागू करण्याची घोषणा करतात. पण त्यांना सीबीएसईचे भाषा बाबतचे धोरण समजले नाही, असे स्पष्ट दिसून येत असल्याची खोचक टीका  युवासेनेचे सहसचिव कल्पेश यादव (Kalpesh Yadav) यांनी केली आहे. शालेय शिक्षण विभागाचे नवनवीन घोषणा करतेवेळी अर्धवट ज्ञान कायमच सगळ्यांनी अनुभवलेलं आहे. शालेय गणवेश तसेच सध्या राज्यभर गाजत असलेला शाळांमध्ये हिंदी भाषा सक्तीची (Hindi language is compulsory) या निर्णयात बदललेली वेळोवेळी भुमिका हे त्याचे चांगले उदाहरण आहे. हिंदी भाषा प्रेमी असलेल्या शिक्षणमंत्री दादा भूसे यांना हिंदीचा एवढा पुळका का? याचे उत्तर त्यांनी द्यावे, असा आक्रमक पावित्रा युवासेनेने घेतला आहे. 

इयत्ता पहिली ते पाचवीसाठी हिंदी ही सर्वसाधारणपणे तृतीय भाषा असेल असा निर्णय राज्याच्या शालेय शिक्षण विभागाने घेतला होता. परंतु आता हिंदी ही भाषा शिकण्याची इच्छा असल्यास विद्यार्थ्यांना घेता येईल, असा अध्यादेश शिक्षण विभागाने प्रसिद्ध केला आहे. हिंदी ऐवजी इतर विषय घेण्यास इच्छुक असणाऱ्या विद्यार्थ्यांची संख्या 20 असल्यास अध्यापनासाठी शिक्षक उपलब्ध करून दिला जाईल किंवा संबंधित भाषा ऑनलाईन शिकवली जाईल, असा दिशाभूल करणारा आणि मराठी माणसावर हिंदी लादण्याचा प्रयत्न केला जात आहे.

राज्य शासनाने काढलेल्या या हिटलरी अध्यादेशाचा युवासेनेकडून जाहीर निषेध करण्यात आला आहे. तसेच सीबीएसईने दोनच भाषांचे पर्याय दिलेले आहेत. तरीही हिंदीचा आग्रह कशाला जर 20 पेक्षा अधिक मुलांनी मागणी केली तर बडोदा, इंदोर व इतर काही शहरात मराठी शिकवणार का? असा सवाल युवासेनेचे सहसचिव कल्पेश यादव यांनी केला आहे. तसेच हिंदी प्रेमी शिक्षणमंत्री दादा भुसे यांनी त्यांना आणि त्यांच्या महायुती सरकारला हिंदीचा एवढा पुळका का? असा सवाल देखील यादव यांनी केला आहे.