छत्रपती शिवाजी महाराजांवर दोन वर्षाचा MA अभ्यासक्रम 'या' वर्षापासून सुरू

एज्युवार्ता न्यूज नेटवर्क

ज्या पुण्यातून छत्रपती शिवाजी महाराजांनी स्वराज्य निर्मितीची सुरुवात केली. त्याच पुण्यातील सावित्रीबाई फुले विद्यापीठात (Savitribai Phule Pune University) शिवरायांवर पदव्युत्तर (एम.ए) अभ्यासक्रम (Postgraduate MA courses) सुरू होणार आहे. येत्या शैक्षणिक वर्षात म्हणजेच 2025-26 मध्ये  शिवजयंती निमित्त विद्यापीठाच्या संरक्षण आणि सामरिक शास्त्र विभागातर्फे छत्रपती शिवाजी महाराजांचे 'व्हिजन अँड नेशन बिल्डिंग' यावर (Vision and Nation Building) पूर्ण वेळ MA अभ्यासक्रम सुरू करण्यात आला असल्याची माहिती विद्यापीठाने दिली आहे. 

छत्रपती शिवाजी महाराज यांच्या 395 व्या जयंती निमित्त आयोजित कार्यक्रमात ही घोषणा करण्यात आली आहे. पुणे विद्यापीठाने सुरू केलेल्या नव्या अभ्यासक्रमामुळे शिवप्रेमींना महाराजांच्या कारकीर्दीची इत्यंभूत माहिती मिळणे सोपे होणार आहे. या दोन वर्षाच्या अभ्यासक्रमात विद्यार्थ्यांना छत्रपती शिवाजी महाराज आणि स्वराज्याची ऐतिहासिक पार्श्वभूमी, शिवरायांनी केलेले युद्ध, त्यासाठीची रणनीती आणि प्रशासनावरील त्यांचे विचार या अभ्यासक्रमाचा समावेश असणार आहे. 

राष्ट्रीय सुरक्षा आणि धोरणात्मक विचारसरणीसाठी त्यांचा दृष्टिकोन, भारतीय राष्ट्रनिर्मिती प्रक्रियेवर त्यांचा प्रभाव, १७ व्या शतकातील दख्खनच्या भौगोलिक, सामाजिक आणि राजकीय वातावरणाबद्दल विद्यार्थ्यांना माहिती मिळणार आहे. या अभ्यासक्रमाचे उद्दिष्ट भारतीय राष्ट्र उभारणीसाठी छत्रपती शिवाजी महाराजांचे आदर्श विचार आणि सध्याच्या काळात त्याची प्रासंगिकता पसरवणे असा आहे.

गुलामगिरीची मानसिकता संपवून राष्ट्र उभारणीसाठी लोकांना प्रेरित करणाऱ्या नेत्याच्या दृष्टिकोनाचा शोध घेण्यासाठी या अभ्यासक्रमाची सुरुवात करण्यात येणार असल्याचे विद्यापीठाकडून सांगण्यात आले आहे. भारतीय राष्ट्रउभारणीची प्रक्रिया आणि त्यावर शिवरायांची भूमिका यावर आढावा घेण्यासाठी हा अभ्यासक्रम तयार करण्यात आला आहे.