इतरांच्या तुलनेत आदिवासी विद्यार्थ्यांमध्ये वेगळी शक्ती; नितीन गडकरी
खरं सांगायचं म्हणजे इतर विद्यार्थ्यांच्या तुलनेत एक वेगळी शक्ती ही आदिवासी मुला-मुलींमध्ये आहे. फक्त त्यांना प्रशिक्षित करण्याची आवश्यकता आहे, आणि हे प्रशिक्षण आपल्याला खेळाच्या माध्यमातून प्राप्त होते, असे विधान केंद्रीय मंत्री नितीन गडकरी (Nitin Gadkari) यांनी केले आहे.
eduvarta@gmail.com 
एज्युवार्ता न्यूज नेटवर्क
आपले व्यक्तित्व, नेतृत्व आणि कर्तृत्व घडवायचे (Eduvarts News) असेल तर आपण वेगवेगळ्या खेळांमध्ये सहभागी होऊन घडवू शकतो. आदिवासी मुलांमध्ये देखील उत्तम नागरिक, उत्तम संशोधक, उत्तम शिक्षक, उत्तम खेळाडू लपलेला आहे. खरं सांगायचं म्हणजे इतर विद्यार्थ्यांच्या तुलनेत एक वेगळी शक्ती ही आदिवासी (Department of Tribal Development) मुला-मुलींमध्ये आहे.फक्त त्यांना प्रशिक्षित करण्याची आवश्यकता आहे. हे प्रशिक्षण आपल्याला खेळाच्या माध्यमातून प्राप्त होते, असे प्रतिपादन केंद्रीय मंत्री नितीन गडकरी (Nitin Gadkari) यांनी केले.
आदिवासी विकास विभागातील आश्रमशाळांच्या राज्यस्तरीय क्रीडा स्पर्धा शुक्रवारपासून नागपूरातील पोलिस मुख्यालयाच्या मैदानावर रंगणार आहेत. तीन दिवसीय या स्पर्धेचे उद्घाटन नितीन गडकरी यांच्या हस्ते झाले. या स्पर्धेसाठी राज्यातील १ हजार ८७५ आदिवासी विद्यार्थी सहभागी होणार आहेत. त्यात ९२९ मुलांचा, तर ९४६ मुलींचा समावेश असणार आहे. १४, १७, आणि १९ वर्षांखालील वयोगटात वैयक्तिक व सांघिक क्रीडा प्रकाराच्या स्पर्धा पार पडणार आहे. यावेळी आदिवासी विकास मंत्री डॉ. अशोक उईके यांच्यासह महसूलमंत्री चंद्रशेखर बावनकुळे, अर्थ व नियोजन राज्यमंत्री आशिष जयस्वाल व स्थानिक लोकप्रतिनिधी उपस्थित होते. या स्पर्धेचा परितोषिक वितरण सोहळा रविवारी ५ जानेवारी रोजी मुख्यमंत्री देवेंद्र फडणवीस यांच्या अध्यक्षतेखाली होणार आहे.
आदिवासी विकास विभागातील आश्रमशाळांच्या राज्यस्तरीय क्रिडा स्पर्धेचे नागपूर येथे नितीन गडकरी यांच्या हस्ते उद्घाटन करण्यात आले. यावेळी उपस्थितांना गडकरी मार्गदर्शन करत होते. आपला विकास झाला पाहिजे,असे प्रत्येकाला वाटते. मात्र, विकास कसा केला गेला पाहिजे यावर चर्चा होत नाही. शाळा, महाविद्यालयात शिक्षण घेऊन विविध प्रकारचे संशोधन, विज्ञान, तंत्रविज्ञान, तंत्रज्ञान याविषयी जो शैक्षणिक विकास केला जातो त्याला आपण ज्ञान म्हणतो. हे ज्ञान सर्वांना देण्याची जबाबदारी सरकारची आहे.
गडकरी म्हणाले, मी आदिवासी विकास मंत्री डॉ. अशोक उईके यांना विनंती करतो की त्यांनी आदिवासी विद्यार्थ्यांसाठी संशोधन, इंजिनिअर, डॉक्टर, आयएएस कसे झाल्या पाहिजे, याचे प्रशिक्षण देणारे प्रशिक्षण केंद्र सुरू केले गेले पाहिजे. ज्यामुळे आदिवासी मुले शिक्षण आणि नोकरीच्या मुख्य प्रवाहात येतील.
