महाविद्यायलयीन शिक्षक, प्राचार्यांना आता डॉ.जे.पी.नाईक आदर्श राज्य शिक्षक पुरस्कार

एज्युवार्ता न्यूज नेटवर्क

ख्यातनाम शिक्षणतज्ज्ञ, पद्मभूषण डॉ. जे. पी. नाईक (Dr. J. P. Naik) यांच्या कार्याची दाखल केवळ भारतानेच नाही तर यूनेस्कोने देखील घेतली. शिक्षण क्षेत्रातील त्यांच्या योगदानाबद्दलची कृतज्ञता म्हणून शिक्षकांना देण्यात येणाऱ्या आदर्श राज्य शिक्षक पुरस्कारचे नाव 'डॉ. जे.पी. नाईक आदर्श राज्य शिक्षक पुरस्कार' (Dr. J.P. Naik Ideal State Teacher Award) असे संबोधले जाणार असल्याचा शासन निर्णय प्रसिद्ध (Government decision published) करण्यात आला आहे. 

सरकारचा मोठा निर्णय! अनुकंपा तत्वावरील १० हजार जागांसाठी भरती; १५ तारखेपासून सुरूवात

विद्यापीठ / पारंपारिक व अभियांत्रिक महाविद्यालये / तंत्रनिकेतने आणि चित्रकला, उपयोजित कला येथील शिक्षकांना देण्यात येणारे "आदर्श राज्य शिक्षक पुरस्कार" चे नांव "डॉ. जे.पी. नाईक आदर्श राज्य शिक्षक पुरस्कार" असे करणेबाबत व सदर पुरस्काराच्या अटी, निकष, निवड प्रक्रिया कार्यपद्धतीत बदल करण्यात येत असल्याचे शासन निर्णयात म्हटले आहे.त्यासंदर्भातील शासन निर्णय प्रसिध्द करण्यात आला आहे. 

महाराष्ट्र शासनाच्या उच्च व तंत्र शिक्षण विभागामार्फत दरवर्षी ५ सप्टेंबर शिक्षक दिनी बहुमोल शैक्षणिक योगदान देणारे प्राचार्य / शिक्षक यांना आदर्श राज्य शिक्षक पुरस्कार दिला जात होता. शिक्षक दिनी त्याबाबत अध्यादेश प्रसिद्ध करून पुरस्काराचे नाव आता  "डॉ. जे. पी. नाईक आदर्श राज्य शिक्षक पुरस्कार" असे कले आहे. लवकरच त्यासंदर्भातील प्रस्ताव मागवून येत्या जानेवारी महिन्यात संबंधित पात्र शिक्षकांना पुरस्कार देऊन गौरविले जाणार आहे. 

प्राचार्य / शिक्षक, डॉ. जे. पी. नाईक आदर्श राज्य शिक्षक पुरस्कारासाठी अर्ज करण्यास / प्रस्ताव पाठविण्यास कोण पात्र राहतील.

शासनाने विहीत केलेल्या सेवाप्रवेश नियमानुसार नियुक्ती झालेले शिक्षक. शिक्षकाने नियमित वर्ग अध्यापनाचे कार्य केलेले असावे. अध्यापनाव्यतिरिक्त अन्य क्षेत्रात प्रतिनियुक्तीवर गेलेले प्रतिनियुक्तीवर आहेत असे शिक्षक पुरस्कारासाठी अपात्र राहतील. याबाबतचे प्रमाणपत्र संबंधित संस्थेचे प्राचार्य / अधिष्ठाता / संचालक देतील. शिक्षकाने कमीत कमी १५ वर्षांची अध्यापन सेवा केलेली असावी, याबाबतचे प्रमाणपत्र संबंधित संस्थेचे प्राचार्य / अधिष्ठाता / संचालक देतील.

डॉ. जे.पी. नाईक आदर्श राज्य शिक्षक पुरस्कार प्राप्त शिक्षक, पुनःश्च अशा पुरस्कारासाठी पात्र राहणार नाहीत. तसेच सेवानिवृत्त झालेले शिक्षक पात्र राहणार नाहीत. याबाबतचे प्रमाणपत्र संबंधित संस्थेचे प्राचार्य / अधिष्ठाता / संचालक देतील. (पाच) विभागीय चौकशीत दोषी आढळलेले, विभागीय चौकशी प्रलंबित असलेले शिक्षक पुरस्कारासाठी अपात्र राहतील. याबाबतचे प्रमाणपत्र संबंधित संस्थेचे प्राचार्य / अधिष्ठाता संचालक देतील. शिक्षकाविरुद्ध फौजदारी कारवाईत शिक्षा झालेली नसावी, तसेच पोलीस स्टेशनमध्ये गुन्हा दाखल नसावा. तसे प्रतिज्ञापत्र संबंधित शिक्षक देतील. शिक्षक खाजगी शिकवणी करीत नसावा, तसे प्रतिज्ञापत्र संबंधित शिक्षक देतील. प्राथमिक अटीचा भंग झाल्यास, पुरस्कार व त्याअनुषंगिक सोयी-सुविधा परत घेण्यात येतील व संबंधितांवर उचित कारवाई करण्यात येईल. प्राचार्यांच्या बाबतीत अर्ज करतेवेळी प्राचार्य उमेदवार यांची प्राचार्य पदावरील किमान सेवा ३ वर्ष पूर्ण असणे आवश्यक आहे.
-------------------------------------------

केवळ भारतानेच नाही तर यूनेस्कोने ज्यांची दाखल घेतली असे ख्यातनाम शिक्षणतज्ज्ञ डॉ. जे.पी नाईक यांच्या नावे आदर्श शिक्षक पुरस्कार देण्याची घोषणा राज्याच्या उच्च शिक्षण विभागाने केली. एका अर्थाने ही आदरणीय डॉ.जे.पी नाईक यांना श्रध्दांजली आहे.ग्रामीण व शहरी भागातील ज्या पात्र शिक्षकांना डॉ. जे. पी. नाईक आदर्श राज्य शिक्षक पुरस्कार मिळतील, ते शिक्षक अधिक तळमळीने आणि जबाबदारीने काम करतील. तसेच या शिक्षकांना पाहून इतर शिक्षकांना चांगले काम करण्याची प्रेरणा मिळेल. 

- डॉ. शैलेन्द्र देवळाणकर, प्र.संचालक, उच्च शिक्षण , महाराष्ट्र राज्य