SPPU विद्यापीठाचा पदवी प्रदान समारंभ २९ सप्टेंबरला; डॉ.अनिल सहस्रबुद्धे प्रमुख पाहुणे 

एज्युवार्ता न्यूज नेटवर्क 

सावित्रीबाई फुले पुणे विद्यापीठाचा १२६ वा पदवी प्रदान समारंभ येत्या २९ सप्टेंबर रोजी आयोजित करण्यात आला असून या कार्यक्रमास राज्याचे उच्च व तंत्रशिक्षण मंत्री चंद्रकांत पाटील सन्माननीय अतिथी व राष्ट्रीय तांत्रिक शिक्षण मंच (NETF) आणि राष्ट्रीय मूल्यांकन व मानांकन परिषदेचे (NAAC) अध्यक्ष प्रा. डॉ. अनिल सहस्रबुद्धे हे प्रमुख अतिथी म्हणून उपस्थित राहणार आहेत.यावेळी विविध विद्याशाखांमधील पदवी व पदव्युत्तर स्तरावरील ९८ हजार ८२१ विद्यार्थ्यांना पदवी प्रमाणपत्र प्रदान केले जाणार आहेत.

याप्रसंगी सावित्रीबाई फुले पुणे विद्यापीठाचे कुलगुरू प्रा. (डॉ.) सुरेश गोसावी , प्र-कुलगुरू प्रा.(डॉ.) पराग काळकर, प्रभारी कुलसचिव प्रा. (डॉ.) ज्योती भाकरे आणि परीक्षा व मुल्यमापन मंडळाचे प्रभारी संचालक प्रा. डॉ. प्रभाकर देसाई यांच्यासह विद्यार्थी व विविध मंडळाचे प्रतिनिधी उपस्थित राहणार आहेत. विद्यापीठाच्या इरावती कर्वे सामाजिक शास्त्र संकुलातील स्वराज्यरक्षक धर्मवीर छत्रपती संभाजी महाराज सभागृहात सकाळी ११.३० वाजता होणार आहे.

 या पदवी समारंभात ७८ हजार ६०९ विद्यार्थ्यांना पदवी प्रमाणपत्र, १९ हजार ५७७ विद्यार्थ्यांना पदव्युत्तर पदवी प्रमाणपत्र, २७० विद्यार्थ्यांना पदविका प्रमाणपत्र, २५९ विद्यार्थ्यांना पीएच.डी., १०३ विद्यार्थ्यांना पदव्युत्तर पदवी पदविका प्रमाणपत्र तर ३ विद्यार्थ्यांना एम.फिलचे प्रमाणपत्र मिळणार आहे. या कार्यक्रमात विविध विद्याशाखांमधील गुणवंत ५४ विद्यार्थ्यांना पाहुण्यांच्या हस्ते ८९ सुवर्णपदके प्रदान करण्यात येणार आहेत. यामध्ये विज्ञान शाखेला सर्वाधिक ३० सुवर्णपदके मिळाली. मुली व मुलांच्या सुवर्णपदकांची संख्या समान असून प्रत्येकी २७ विद्यार्थ्यांनी सुवर्णपदक मिळविले आहे. 

---------- 

शाखानिहाय विद्यार्थ्यांची आकडेवारी खालीलप्रमाणे :-

आर्किटेक्चर – ८०३

कला – ५६२०

वाणिज्य – २०,५००

शिक्षण – २०८५

अभियांत्रिकी – ३२,७८१

विधी – ३९५४

व्यवस्थापन – १०,२२३

मेंटल अ‍ॅण्ड मॉरल – ३२४

फार्मसी – ४०७८

शारीरिक शिक्षण – ४३

विज्ञान – १८,३०१

तंत्रज्ञान – १०९