कस्तुरी शिक्षण संस्थेकडून बेकायदा शुल्क वसुली; विद्यार्थी संघटनेचे आंदोलन

एज्युवार्ता न्यूज नेटवर्क 

कस्तुरी शिक्षण संस्थेतर्फे (Kasturi education institute) विद्यार्थ्यांकडून इतर शुल्काच्या नावाखाली बेकायदेशीरपणे तब्बल 15 हजार रुपये शुल्क वसूल केले जात आहे.तसेच वसूल केलेल्या शुल्काची पावती किंवा विद्यार्थ्यांना त्याचा कोणताही मोबदला दिला जात नाही. त्याचप्रमाणे शासनाकडून विद्यार्थिनींना व्यावसायिक अभ्यासक्रमाचे शिक्षण मोफत दिले जात असताना कस्तुरी शिक्षण संस्थेकडून एकूण शुल्काच्या सुमारे 19 हजार रुपये शुल्क अवैध्य पद्धतीने वसूल केले जात आहे, असा आरोप करत महाराष्ट्र राज्य विद्यार्थी काँग्रेसतर्फे कस्तुरी शिक्षण संस्थेच्या फार्मसी कॉलेज विरोधात आंदोलन करण्यात आले.

शिक्रापूर येथील कस्तुरी शिक्षण संस्थेच्या माध्यमातून विविध अभ्यासक्रम चालविले जातात. मात्र,सुमारे वर्षभरापूर्वी मराठी विषय बंद केल्याप्रकरणी संबंधित शिक्षण संस्था चर्चेत आली होती. सावित्रीबाई फुले पुणे विद्यापीठाने या प्रकरणे संबंधित संस्थेची चौकशी करण्यासाठी समिती स्थापन केले होते.या समितीने महाविद्यालयावर कारवाई करण्याचा अहवाल दिला होता. त्यानंतर आता पुन्हा एकदा विद्यार्थ्यांकडून बेकायदेशीरपणे शुल्क वसूल केल्याप्रकरणी विद्यार्थी संघटनांकडून संस्थेविरोधात आंदोलन केले जात आहे. कस्तुरी शिक्षण संस्थेचे फार्मसी महाविद्यालय लोणेरे येथील डॉ. बाबासाहेब आंबेडकर तंत्रशास्त्र विद्यापीठाशी संलग्न आहे. संबंधित विद्यापीठ हे पुण्याबाहेर असल्यामुळे विद्यार्थ्यांना विद्यापीठात जाऊन या संदर्भात दाद मागणे शक्य होत नाही. त्यामुळे विद्यार्थी संघटनांनी महाविद्यालयाच्या आवारात बेकायदा शुल्क वसुली विरोधात घोषणाबाजी करत आंदोलन करण्यात आले. 

महाविद्यालयाकडून बेकायदेशीर शुल्क आकारले जात असून एखाद्या विद्यार्थ्याने शुल्क जमा करण्यास नकार दिला तर संबंधित विद्यार्थ्याला परीक्षेला बसू दिले जात नाही. विद्यार्थिनींना व्यावसायिक अभ्यासक्रमाचे शुल्क माफ असताना संबंधित महाविद्यालयाकडून बेकायदेशीरपणे विद्यार्थिनींकडून शुल्क आकारले जाते. त्यामुळे महाराष्ट्र राज्य विद्यार्थी काँग्रेस तर्फे महाविद्यालय विरोधात आंदोलन करण्यात आले,असे महाराष्ट्र राज्य विद्यार्थी काँग्रेसचे सरचिटणीस महेश कांबळे यांनी सांगितले.

दरम्यान, कस्तुरी शिक्षण संस्थेशी या प्रकरणी संपर्क साधण्याचा प्रयत्न केला असता संपर्क होऊ शकला नाही.