मोझे कॉलेजवरील दंडात्मक कारवाईला SPPU व्यवस्थापन परिषदेची मान्यता;10वर्षे परीक्षा केंद्र बंद,3 लाख दंड
दहा वर्षे परीक्षा केंद्र बंद, तीन लाख रुपये दंड, आणि कॉलेज स्टाफला परीक्षेचे काम करण्यास मज्जाव यास व्यवस्थापन परिषदेकडून मान्यता देण्यात आली.व्यवस्थापन परिषदेच्या सूचनेनुसार आता विद्यापीठाच्या संबंधित अधिकार मंडळाकडून पुढील कार्यवाही पूर्ण केली जाणार आहे.
eduvarta@gmail.com 
एज्युवार्ता न्यूज नेटवर्क
पुण्यातील वाघोली येथील पार्वतीबाई गेनाबा मोझे कॉलेज ऑफ इंजिनिअरिंगवरील (Parvatibai Genaba Moze College of Engineering in Wagholi) दंडात्मक कारवाईला नुकत्याच झालेल्या सावित्रीबाई फुले पुणे विद्यापीठाच्या (Savitribai Phule Pune University)व्यवस्थापन परिषदेत (Management Council)मान्यता देण्यात आली. चौकशी समितीने केलेल्या शिफारशीनुसार आता कॉलेजला तीन लाख रुपयांचा दंड, दहा वर्षे कॉलेजचे परीक्षा केंद्र बंद (College examination center closed for ten years)आणि कॉलेजच्या शिक्षक व शिक्षकेतर कर्मचाऱ्यांना परीक्षेचे काम करण्यास बंदी,अशी कारवाई केली जाणार आहे. त्यामुळे परीक्षेच्या कामात अशा प्रकारे गैरव्यवहार करणाऱ्या महाविद्यालयांसाठी हा मोठा धडा आहे.त्याचप्रमाणे पूर्णवेळ प्राचार्य नियुक्त करणे व इतर बाबींची पूर्तता करण्याच्या सूचना विद्यापीठाकडून दिल्या जाणार आहेत.
रात्रीच्या अंधारात विद्यार्थ्यांना कॉलेजच्या एका प्राध्यापकाने झालेल्या पेपरच्या उत्तरपत्रिका पुन्हा लिहिण्यासाठी दिल्याची धक्कादायक माहिती समोर आली होती. त्यानंतर संबंधितांवर गुन्हा दाखल करण्यात आला. तसेच विद्यापीठाने या प्रक्रियेची चौकशी करण्यासाठी व्यवस्थापन परिषदेचे सदस्य डॉ. देविदास वायदंडे यांच्या अध्यक्षतेखाली समिती स्थापन केली. या समितीमध्ये अधिष्ठाता डॉ.प्रमोद पाटील यांच्यासह प्राचार्य डॉ.सुनील ठाकरे, प्राचार्य डॉ.सुनीता आढाव आणि समीर भोसले यांचा सदस्य म्हणून समावेश करण्यात आला होता.चौकशी समितीने कॉलेजला भेट देवून सर्व बाबींची पहाणी करून विद्यापीठाला अहवाल सादर केला. विद्यापीठाच्या परीक्षा विभागाने संबंधित अहवाल व्यवस्थापन परिषदेसमोर ठेवला. त्यावर चर्चा करून मंजूरी देण्यात आली.
पार्वतीबाई गेनबा मोझे कॉलेजवर विद्यापीठाची मोठी कारवाई; रात्रीच्या अंधारात विद्यार्थ्यांनी लिहिला पेपर
परीक्षेसारख्या गोपनिय कामाबाबत अक्षम्य दूर्लक्ष केल्यामुळे वाघोली येथील पार्वतीबाई गेनाबा मोझे कॉलेज ऑफ इंजिनिअरिंगवर दंडात्मक कारवाई करण्यात आली आहे. याबद्दल विद्यापीठाच्या अधिकार मंडळाचे अभिनंदन केले जात आहे. मात्र, केवळ मोझे कोळेमध्येच अशा घटना घडतात, असे नाही तर इतरही ठिकाणी यांसारख्या घटना घडण्याची शक्यता नाकारता येत नाही. त्यामुळे विद्यापीठाने याबाबत गांभीर्याने विचार करावा,अशी अपेक्षा व्यक्त केली जात आहे.
___________
सावित्रीबाई फुले पुणे विद्यापीठाने नियुक्त केलेल्या चौकशी समितीने विद्यापीठाला सादर केलेला अहवाल परीक्षा विभागातर्फे व्यवस्थापन परिषदेसमोर अवलोकनार्थ सादर करण्यात आला.त्यात केलेल्या शिफारशीनुसार दहा वर्षे परीक्षा केंद्र बंद, तीन लाख रुपये दंड, आणि कॉलेज स्टाफला परीक्षेचे काम करण्यास मज्जाव यास व्यवस्थापन परिषदेकडून मान्यता देण्यात आली.व्यवस्थापन परिषदेच्या सूचनेनुसार आता विद्यापीठाच्या संबंधित अधिकार मंडळाकडून पुढील कार्यवाही पूर्ण केली जाणार आहे.
- डॉ. प्रभाकर देसाई, प्रभारी संचालक, परीक्षा व मूल्यमापण मंडळ, सावित्रीबाई फुले पुणे विद्यापीठ
---------------------------------
सावित्रीबाई फुले पुणे विद्यापीठाशी संलग्न वाघोली येथील मोझे कॉलेजवर व्यवस्थापन परिषदेच्या मान्यतेने दंडात्मक कारवाई करण्यात आली असून या पुढील काळात एखाद्या कॉलेजमध्ये अशा प्रकारची घटना घडली तर त्यांची गंभीर दाखल घेतली जाईल. परीक्षेच्या कामात पारदर्शकता ठवण्यास विद्यापीठ प्रशासन नेहमीच प्राधान्य देते आणि यापुढेही देत राहील.
- डॉ. देविदास वायदंडे, सदस्य, व्यवस्थापन परिषद, सावित्रीबाई फुले पुणे विद्यापीठ
-------------------------------
संबंधित बातम्या
धक्कादायक: चार प्राध्यापकांना अटक; इंजिनिअरिंगच्या विद्यार्थ्यांना रात्री पुन्हा उत्तरपत्रिका लिहिण्यासाठी दिल्या..
