परदेशी विद्यार्थ्यांची 80 हजाराची रोकड रिक्षा चालकाने केली परत 

एज्युवार्ता न्यूज नेटवर्क 

तब्बल 80 हजार रुपयांची रोकड, पासपोर्ट आणि इतर साहित्याने भरलेली बॅग एक परदेशी विद्यार्थी रिक्षातच विसरला. मात्र सुदैवाने प्रामाणिक रिक्षा चालक आणि विद्यापीठातील सुरक्षा कर्मचारी यांच्या मदतीने संबंधित विद्यार्थ्याला काही तासातच आपली हरवलेली बॅग आणि रक्कम परत मिळाली. काही समाज कंटकांकडून परदेशी नागरिकांची फसवणूक केल्याच्या घटना समोर येत असतात. पण रिक्षा चालक राहुल पाटील यांनी दाखवलेल्या प्रामाणिकपणामुळे या परदेशी विद्यार्थ्यांला त्याची रक्कम मिळाली.

 देवादत्त बँक हा बांगलादेशी विद्यार्थी पुण्यात शिक्षण घेत आहे. फर्ग्युसन कॉलेज येथून तो सावित्रीबाई फुले पुणे विद्यापीठात आंतरराष्ट्रीय विद्यार्थी केंद्रात आला.मात्र, हा  प्रवास करत असताना त्याची बॅग रिक्षा चालक राहुल पाटील यांच्या रिक्षामध्ये विसरली. आता ती रिक्षा कशी आणि कुठे शोधावी असा प्रश्न या विद्यार्थ्याला पडला होता.त्यानंतर त्याने याबाबत विद्यापीठाच्या सुरक्षा विभागाकडे याबाबत तक्रार दिली. परंतु, दरम्यानच्या काळात आपल्या रिक्षामध्ये प्रवाशाची बॅग विसरलेली आहे, हे पाहून राहुल पाटील यांनी ती बॅग परत देण्यासाठी हडपसर होऊन पुन्हा थेट सावित्रीबाई फुले पुणे विद्यापीठ गाठले. यावेळी विद्यापीठात पाटील यांची भेट सुधीर दळवी आणि भारत ठुबे यांच्याशी झाली. त्यांनी संबंधित विद्यार्थ्यांला पोलिसांसमोर त्याच्या बागेतील रोख रक्कम 80 हजार, पासपोर्ट व इतर साहित्य सुखरूप परत दिले.