आर्मी लॉ कॉलेजच्या विद्यार्थ्यांचे प्राचार्यांच्या राजीनाम्यासाठी आंदोलन 

एज्युवार्ता न्यूज नेटवर्क 

सावित्रीबाई फुले पुणे विद्यापीठाशी संलग्न आर्मी लॉ कॉलेजच्या (Army Law College)विद्यार्थ्यांनी विविध मागण्यांसाठी कॉलेजच्या प्राचार्यांच्या दालनासमोर ठिय्या आंदोलन (students protest)सुरू केले आहे. गेल्या पाच ते सहा दिवसांपासून हे आंदोलन सुरू असून कॉलेज प्रशासन कोणतीही दाद देत नसल्याचे चित्र आहे. विद्यार्थ्यांना कॉलेजचे प्राचार्य व रजिस्टार यांच्याकडून वाईट वागणूक दिली जात असल्याचा आरोप आंदोलक विद्यार्थ्यांकडून केला जात आहे. प्राचार्य राजीनामा (resignation of the principal) देत नाही तोपर्यंत आंदोलन मागे न घेण्याचा पवित्र विद्यार्थ्यांनी घेतला आहे.

आर्मी लॉ कॉलेजच्या विद्यार्थ्यांना फायनान्स व अकाउंटन्सी शिकवण्यासाठी शिक्षक उपलब्ध नाहीत. कॉलेजमध्ये शैक्षणिक सोयी सुविधांचा अभाव आहे. कॉलेजचे विद्यार्थी विविध स्पर्धांमध्ये सहभागी होण्यासाठी गेल्यास त्यांची शैक्षणिक रजा मंजूर केली जात नाही, अशा विविध कारणांमुळे विद्यार्थ्यांनी आंदोलनाचे हत्यार उगारले आहे.दरम्यान,विद्यार्थ्यांनी आंदोलन मागे न घेतल्या त्यांच्यावर कारवाई करण्याचा इशारा कॉलेज प्रशासनाने दिला आहे. 

विधी अभ्यासक्रमाच्या विद्यार्थ्यांना पायाभूत सुविधांसाठी आंदोलन करण्याची वेळ येत असेल तर याबाबत विद्यापीठ प्रशासनाने हस्तक्षेप करण्याची गरज आहे. कॉलेजच्या प्राचार्य डॉ.मधुश्री जोशी आणि रजिस्टार कर्नल सुनील मेनन यांच्या विरोधात विद्यार्थ्यांचा असणारा रोष दिवसेंदिवस वाढत असल्याचे दिसून येत आहे. त्यामुळे याबाबत कोण आणि केव्हा मार्ग काढणार ?असा प्रश्न उपस्थित केला जात आहे. दरम्यान विद्यापीठातील अधिकाऱ्यांशी यासंदर्भात चर्चा केली असता कॉलेजच्या एकाही विद्यार्थ्याने विद्यापीठाकडे याबाबत लेखी तक्रार दिली नसल्याचे त्यांनी सांगितले.दरम्यान,याबाबत कॉलेजच्या प्राचार्य डॉ.मधुश्री जोशी यांच्याशी संपर्क साधण्याचा प्रयत्न केला असता संपर्क होऊ शकला नाही.