CAPF : केंद्रीय सशस्त्र पोलीस दलात कॉन्स्टेबल पदाच्या परीक्षा होणार मराठीतून..

एज्युवार्ता न्यूज नेटवर्क

ग्रामीण भागातील भरती परीक्षा देणारे अनेक तरूण देशसेवेचे स्वप्न पाहात केंद्रीय दलाच्या (Central Force Exam) विविध परीक्षा देतात. मात्र, राज्यातील बहुतांश तरुणांचे शिक्षण हे मातृभाषेत झालेले असल्याने त्यांना अनेक गोष्टींचा सामना करावा लागत होता. शारिरीकदृष्ट्या तंदुरुस्त असताना केंद्रीय दलाच्या  इंग्रजी माध्यमात होणाऱ्या स्पर्धा परीक्षेत लेखी पेपरमध्ये मार्क कमी मिळायचे आणि स्वप्न अर्धवट राहून जायचे. त्या अनुषंघाने केंद्रीय सशस्त्र पोलीस दलाच्या (CAPF) कॉन्स्टेबल दलाच्या (Central Armed Police Constable Force) परीक्षेबाबत गृह मंत्रालयाने मोठा निर्णय (Ministry of Home Affairs) घेतला आहे. सध्या रिक्त पदांसाठी भरती प्रक्रिया राबवली जात आहे. या परीक्षेत इंग्रजी, हिंदीसह १३ प्रादेशिक भाषांमध्ये पेपर देण्यात येणार आहेत. त्यामध्ये मराठी भाषेचा देखील समावेश (Including Marathi language) आहे. त्यामुळे राज्यातील केंद्रीय सशस्त्र पोलीस दलाची भरती करणाऱ्या उमेदवारांना हा मोठा दिलासा मिळाला आहे. 

देशभरातील विविध नियुक्त परीक्षा केंद्रांवर २० फेब्रुवारी ते ७ मार्च या कालावधीत परीक्षा घेतली जाणार आहे. यंदा सुमारे ४८ लाख विद्यार्थी या परीक्षेत सहभागी होणार आहेत. ही परीक्षा देशभरातील १२८ शहरांमध्ये घेतली जाणार आहे. सीआरपीएफ कॉन्स्टेबल (जनरल ड्युटी) परीक्षेच्या प्रश्नपत्रिका आता  १३ प्रादेशिक भाषांमध्ये सेट केल्या जातील यामध्ये हिंदी आणि इंग्रजी शिवाय मराठी, आसामी, बंगाली, गुजराती, मल्याळम, कन्नड, तामिळ, तेलगू, उडिया, उर्दू, पंजाबी, मणिपुरी आणि कोकणी या भाषांचा समावेश आहे.

कॉन्स्टेबल जीडी परीक्षा ही स्टाफ सिलेक्शन कमिशन (एसएससी) द्वारे आयोजित केलेल्या प्रमुख परीक्षांपैकी एक आहे ज्यामध्ये देशभरातून लाखो उमेदवार बसतात. देशभरातील या परीक्षेच्या संदर्भात, आता गृह मंत्रालय आणि कर्मचारी निवड आयोगाने हिंदी आणि इंग्रजी व्यतिरिक्त वरील १३ प्रादेशिक भाषांमध्ये परीक्षा आयोजित करण्यासाठी एक सामंजस्य करार केला आहे. ज्यामुळे कर्मचारी निवड आयोगाने (एसएससी) आता २०२४ मध्ये विविध भाषांमध्ये परीक्षा घेण्याचा निर्णय घेतला आहे.