पीएम इंटर्नशिप योजनेसाठीच्या निवड प्रक्रियेला सुरुवात

एज्युवार्ता न्यूज नेटवर्क 

प्रधानमंत्री इंटर्नशिप योजना फेज-२ (PM - Internship - Scheme) (पीएम इंटर्नशिप योजना २०२५) साठी नोंदणी केलेल्या तरुणांसाठी एक मोठी बातमी आहे. कॉर्पोरेट व्यवहार मंत्रालयातर्फे (Ministry of Corporate Affairs) अर्ज केलेल्या उमेदवारांची शॉर्टलिस्टिंग आणि निवड प्रक्रिया (The shortlisting and selection process)  १ एप्रिलपासून सुरू झाली आहे. दुसऱ्या टप्प्यात, देशभरातील टॉप ५०० कंपन्यांमध्ये एकूण १ लाख पदांसाठी इंटर्नशिपच्या संधी उपलब्ध करून दिल्या जातील. देशभरातील ७३० जिल्ह्यांमध्ये या नियुक्त्या केल्या जाणार आहेत. 

वेबसाइटवर दिलेल्या माहितीनुसार, निवड प्रक्रिया १ एप्रिलपासून सुरू झाली आहे. त्यामुळे उमेदवारांनी त्यांच्या मोबाईल, डॅशबोर्ड आणि ईमेलवर सतत लक्ष ठेवावे. या माध्यमातून इंटर्नशिपशी संबंधित माहिती दिली जाईल.

पीएम इंटर्नशिप फेज २ मध्ये निवडलेल्या उमेदवारांना १२ महिन्यांच्या कालावधीसाठी देशभरातील टॉप ५०० कंपन्यांमध्ये इंटर्नशिप करण्याची संधी मिळेल. इंटर्नशिपचा कालावधी १२ महिने म्हणजेच १ वर्षाचा असेल. या कालावधीत, निवडलेल्या उमेदवारांना दरमहा ५,००० रुपये स्टायपेंड दिले जाईल. यापैकी केंद्र सरकार ४ हजार ५०० रुपये देईल आणि कंपन्या त्यांच्या कॉर्पोरेट सोशल रिस्पॉन्सिबिलिटी (CSR) निधीतून ५०० रुपये देतील.

रिक्त जागांसाठी अर्ज करण्याची मुदत १५ एप्रिलपर्यंत वाढवली

उर्वरित जागांच्या पार्श्वभूमीवर कॉर्पोरेट व्यवहार मंत्रालयाने फेज २ साठी अर्ज करण्याची शेवटची तारीख १५ एप्रिलपर्यंत वाढवली आहे.  इंटर्नशिप करू इच्छिणारे उमेदवार pminternship.mca.gov.in ला भेट देऊन अर्ज प्रक्रिया पूर्ण करू शकतात.