विद्यार्थ्यांचे भविष्य धोक्यात : महिला शिक्षिकेच्या जागेवर दुसरी महिला शिकवताना समोर 

एज्युवार्ता न्यूज नेटवर्क 

विद्यार्थ्यांचे भविष्य घडवणे हे शिक्षकांचे काम असते. मात्र, याच विद्यार्थ्यांच्या भविष्याशी खेळ खेळण्याचा धक्कादायक प्रकार भोर येथून समोर आला आहे. भोर नगरपालिकेच्या महाराणा प्रताप शाळा क्रमांक -१ (Maharana Pratap School No-1) या शाळेतील एक शिक्षिका सतत गैरहजर (Teacher constantly absent) राहून दुसऱ्याच महिलेला (Dummy teacher) अध्यापन करण्यास पाठवत असल्याचे समोर आले आहे. या प्रकरणावर पालकांनी तीव्र नाराजी व्यक्त केल्यानंतर शिक्षिकेला सेवेतून निलंबित करण्यात आले आहे. 

मुख्याधिकारी आणि प्रशासन अधिकारी यांनी अचानक शाळेला भेट दिली. यावेळी शिक्षिका भारती मोरे या अनुपस्थित असल्याचे दिसून आले. मात्र, रजिस्टरवर मोरे यांच्या नावासमोर त्यांची उपस्थितीची सही असल्याचे दिसून आले. त्यावेळी अधिकाऱ्यांच्या मनात शंका उपस्थित झाली. त्यामुळे त्यांनी सविस्तर माहिती घेण्याचा प्रयत्न केला तेव्हा असे निदर्शनास आले की, शिक्षिका मोरे यांच्या जागी दुसरीच एक महिला अध्यापन करत आहे. विशेष म्हणजे या शिक्षिकेने सदरील महिलेला ठराविक रक्कम देऊन अध्यापक करण्यास ठेवले असल्याचे समोर आले. 

विद्यार्थ्यांची सुरक्षितता धोक्यात आणल्यामुळे मुख्याधिकाऱ्यांनी भारती मोरे यांना खुलासा देण्याचे आदेश दिले. मात्र, त्यांचा खुलासा असमाधानकारक असल्याने त्यांना तात्काळ निलंबित करण्यात आले आहे. भारती मोरे यांच्यावर विनापरवानगी गैरहजर राहणे, विनापरवानगी मुख्यालय सोडणे, कर्तव्यात निष्काळजीपणा करणे, गैरहजर कालावधीत खासगी व्यक्तीला वर्गाचा ताबा देणे, वर्ग उघडे ठेवून चाव्या त्रयस्त व्यक्तीकडे देणे, विद्यार्थ्यांच्या गुणवत्तावाढीस अडथळा निर्माण करणे, या कारणांमुळे निलंबन करण्यात आले. 

नगरपालिकेचे कार्यालयीन अधीक्षक, शिक्षण विस्तार अधिकारी आणि केंद्रप्रमुख यांची त्रिस्तरीय समिती नियुक्त करण्यात आली आहे. समितीचा अहवाल येईपर्यंत मोरे यांचे निलंबन राहणार आहे. हा धक्कादायक प्रकार समोर आल्यानंतर पालकांमधून तीव्र नाराजी व्यक्त केली जात आहे.