मुक्त विद्यापीठ देशात अव्वल, माजी विद्यार्थी संघाची सर्वाधिक नोंदणी 

एज्युवार्ता न्यूज नेटवर्क 

यशवंतराव चव्हाण महाराष्ट्र मुक्त विद्यापीठाच्या (Yashwantrao Chavan Maharashtra Open University) माजी विद्यार्थी संघाने (Former students' association) पाच लाख माजी विद्यार्थी सदस्य नोंदणीचा (Five lakh alumni members registered) टप्पा पार केला आहे. माजी विद्यार्थी संघाकडे पावणेपाच वर्षापासून आजतागत तब्बल ५ लाख ६ हजार ८५७ विद्यार्थ्यांनी सदस्यता नोंद केलेली आहे. त्यामुळे यशवंतराव चव्हाण महाराष्ट्र मुक्त विद्यापीठ हे सर्वाधिक माजी विद्यार्थी सदस्य नोंदणी असलेले देशातील अव्वल विद्यापीठ ठरले आहे.

सन १९८९ मध्ये मुक्त विद्यापीठाची स्थापना झाल्यानंतर त्यातून आजतागत सुमारे ५५ लाखांहून अधिक विद्यार्थ्यांनी विविध शिक्षणक्रमांच्या पदव्या प्राप्त केलेल्या आहेत. सन २०२० मध्ये विद्यापीठात माजी विद्यार्थी संघाची स्थापना करण्यात आली. त्यापाठोपाठ तंत्रज्ञानाचा व विविध समाजमाध्यमांचा प्रभावी वापर करत माजी विद्यार्थ्यांचे संघठन वाढविण्यावर भर देण्यात आला. 

त्यामुळे माजी विद्यार्थी संघाच्या सदस्य संख्येत दिवसागणिक वाढ होत आहे. विद्यापीठाने यापूर्वी उल्लेखनीय माजी विद्यार्थ्यांच्या यशोगाथा पुस्तकरूपात प्रसिद्ध केल्या आहेत. विद्यापीठ दृकश्राव्य विभागाचे डॉ. संतोष साबळे हे स्थापनेपासून या माजी विद्यार्थी संघाचे सरचिटणीस म्हणून प्रमुख कार्य करीत आहेत. कुलगुरू प्रा. संजीव सोनवणी यांच्या मार्गदर्शनाखाली लवकरच जगभरातील माजी विद्यार्थांचा मेळावा आयोजित करण्याचा मनोदय असल्याचे या माजी विद्यार्थी संघाचे अध्यक्ष तथा विद्यापीठाचे कुलसचिव दिलीप भरड यांनी सांगितले.