NBEMS कडून डी. फार्मसी एक्झिट परीक्षा 2024 साठी अर्ज प्रक्रिया सुरू..

एज्युवार्ता न्यूज नेटवर्क 

अनेक दिवसांपासून बहुप्रतिक्षित असलेल्या डी फार्मसी एक्झिट परीक्षा 2024 (D Pharma Exit Exam 2024) च्या तारखा नॅशनल बोर्ड ऑफ एक्झामिनेशन इन मेडिकल सायन्सेसने  (NBEMS) जाहीर (Dates announced) केल्या आहेत. त्यासाठी अर्ज प्रक्रिया सुरू झाली असून डी फार्मसी उत्तीर्ण उमेदवार एनपीईएमएसचे अधिकृत संकेतस्थळ https://natboard.edu.in वर अर्ज करू शकतात. डिप्लोमा इन फार्मसी एक्झिट एक्झामिनेशन (DPEE) ऑक्टोबर 2024 साठी उमेदवारांना 13 सप्टेंबर पर्यंत ऑनलाइन पद्धतीने अर्ज करता येणार आहे.

NBEMS च्या नियमांनुसार, DPEE साठी तीन पेपर घेतले जाणार आहेत. त्यामध्ये पेपर - 1, पेपर - 2 आणि पेपर - 3 यांचा समावेश आहे. DPEE ऑक्टोबर 2024 ही परीक्षा संगणक आधारित 3, 4 आणि 5 ऑक्टोबर 2024 रोजी देशभरातील विविध परीक्षा केंद्रांवर घेतली जाईल. या परीक्षेत सहभागी होणाऱ्या सर्व उमेदवारांना दोन गटांमध्ये विभागले जाईल आणि त्यांना प्रत्येक दिवशी सकाळी किंवा दुपारच्या शिफ्टमध्ये देणे आवश्यक असेल. NBEMS द्वारे परीक्षा शिफ्टचे वाटप केले जाईल. या परीक्षेचा निकाल 4 नोव्हेंबर रोजी जाहीर करण्यात येणार आहे. 

ज्या उमेदवारांनी फार्मसीमधील डिप्लोमा मान्यताप्राप्त अभ्यासक्रम यशस्वीरीत्या पूर्ण केला आहे आणि ते फार्मसी एक्झिट परीक्षेत पात्र झाले आहेत, असेच विद्यार्थी फार्मसी कायदा 1948 च्या कलम 32 अंतर्गत फार्मासिस्ट म्हणून नोंदणी करू शकतील. यंदा प्रथमच घेण्यात येणाऱ्या या परीक्षेमुळे विद्यार्थ्यांना मोठी कसरत करावी लागणार आहे. यापुर्वी डी फार्मसी पास झाले की, मेडीकल लायसन्स मिळायचे मात्र, या पुढील काळात विद्यार्थ्यांना एक्झिट परीक्षा पास होणे देखील अनिर्वार्य असणार आहे.