कॉलेजवरील कारवाई टळली; नॅक मूल्यांकनाला 6 महिने मुदतवाढ
मूल्यांकन करून न घेतलेल्या महाविद्यालयांचे प्रथम वर्षाचे प्रवेश थांबविण्याची कारवाई राज्यातीलअ काही विद्यापीठांकडून करण्यात आली होती. मात्र, नॅक मूल्यांकन करून घेण्यास सहा महिन्यांची मुदतवाढ देण्यात आली आहे. परिणामी महाविद्यालयांवरील प्रवेश बंदीची कारवाई टळली आहे.
eduvarta@gmail.com 
एज्युवार्ता न्यूज नेटवर्क
राज्याच्या उच्च शिक्षण विभागाने सर्व महाविद्यालयांना व शैक्षणिक संस्थांना नॅक मूल्यांकन (NAAC Assessment) करून घेण्याचे निर्देश दिले होते. तसेच मूल्यांकन करून न घेतलेल्या महाविद्यालयांचे प्रथम वर्षाचे प्रवेश थांबविण्याची कारवाई राज्यातीलअ काही विद्यापीठांकडून करण्यात आली होती. मात्र, नॅक मूल्यांकन करून घेण्यास सहा महिन्यांची मुदतवाढ देण्यात आली आहे. परिणामी महाविद्यालयांवरील प्रवेश बंदीची कारवाई टळली आहे. राज्याचे प्र.उच्च शिक्षण संचालक डॉ.शैलेंद्र देवळाणकर (Director of Higher Education Dr. Shailendra Deolankar)यांनी यासंदर्भातील परिपत्रक प्रसिद्ध केले आहे.
'नॅक'कडून बायनरी ॲक्रेडिटेशन पद्धती लागू करण्यात आली आहे.ही पद्धती लागू करण्याच्या अनुषंगाने नॅक संस्थेकडून उच्च शिक्षण संस्थांसाठीचे लॉगिन पोर्टल अद्यावत करण्याची प्रक्रिया राबवली जात आहे. त्यामुळे सध्या नव्याने मूल्यांकन करून घेणे, पुनर्रमुल्यांकन करणे, याबाबत कुठलीही कार्यवाही होत. ही बाब राज्याचे उच्च शिक्षण मंत्री चंद्रकांत पाटील यांच्या अध्यक्षतेखाली 21 मे रोजी झालेल्या बैठकीत निदर्शनास आली. त्यानंतर विद्यार्थी हितास्तव नॅक मूल्यांकनासाठी महाविद्यालयांना मुदतवाढ देण्याचे निर्देश दिले आहेत.
राज्यातील अमरावती विद्यापीठ, डॉ. बाबासाहेब आंबेडकर मराठवाडा विद्यापीठ आणि मुंबई विद्यापीठासह काही विद्यापीठांनी अनेक महाविद्यालयांवर कारवाईचा बडगा उगारला होता. मात्र,नॅक मूल्यांकनाची प्रक्रियाच बंद असल्यामुळे महाविद्यालयांवर कार्यवाही करणे उचित ठरणार नाही. त्यामुळे शिक्षण विभागाने नॅक मूल्यांकन करून न घेतलेल्या महाविद्यालयांवरील कारवाईला स्थगिती दिली असून यासंदर्भातील सविस्तर परिपत्रक प्रसिद्ध केले आहे.
