MPSC News : गट-क सेवा मुख्य परीक्षेसाठी अर्ज भरण्यास मुदतवाढ, आंदोलनाच्या पार्श्वभूमीवर निर्णय
आयोगाकडून मुदतवाढीचे पत्रक प्रसिध्द करण्यात आले असले तरी त्यामध्ये प्रशासकीय कारण देण्यात आले आहे. अर्ज करण्यास मुदतवाढ दिल्याने पात्र उमेदवारांना मोठा दिलासा मिळाला आहे.
eduvarta@gmail.com 
एज्युवार्ता न्यूज नेटवर्क
महाराष्ट्र लोकसेवा आयोगाने (MPSC) महाराष्ट्र गट-क सेवा मुख्य परीक्षा २०२३ या परीक्षेसाठी अर्ज सादर करण्यास दि. ३ नोव्हेंबरपर्यंत मुदतवाढ दिली आहे. मराठा आरक्षणासाठी (Maratha Reservation) सुरू असलेल्या आंदोलनाच्या पार्श्वभूमीवर बीड (Beed) जिल्ह्यातील इंटरनेट सेवा बंद करण्यात आली. त्यामुळे जिल्ह्यातील उमेदवारांना अर्ज भरण्यात अडचणी येत असल्याने आयोगाने हा निर्णय घेतल्याचे समजते.
आयोगाकडून मुदतवाढीचे पत्रक प्रसिध्द करण्यात आले असले तरी त्यामध्ये प्रशासकीय कारण देण्यात आले आहे. अर्ज करण्यास मुदतवाढ दिल्याने पात्र उमेदवारांना मोठा दिलासा मिळाला आहे. त्यानुसार आता ऑनलाईन अर्ज सादर करून ऑनलाईन शुल्क भरण्यासाठी दि. ३ नोव्हेंबरपर्यंत मुदत असेल.
संचारबंदी, इंटरनेट सेवा बंदमुळे विद्यार्थी हवालदिल; परीक्षेला मुकण्याची भीती, अर्जही भरता येईनात
चलनाद्वारे शुल्क भरण्यासाठी चलनाची प्रत घेणे तसेच भारतीय स्टेट बँकेमध्ये परीक्षा शुल्क भरण्यासाठी दि. ६ नोव्हेंबरपर्यंत मुदत देण्यात आली आहे. या तारखेनंतर शुल्क भरल्यास वैध मानले जाणार नाही. तसेच परीक्षा शुल्काचा परतावाही केला जाणार नाही, असे आयोगाकडून स्पष्ट करण्यात आले आहे.
दरम्यान, बीड जिल्ह्यासह (Beed District) इतर काही जिल्ह्यांमध्ये मराठा आरक्षण (Maratha Reservation) आंदोलनाला हिंसक वळण लागले आहे. काही ठिकाणी जाळपोळीच्या घटना घडल्याने जिल्हा प्रशासनाकडून बीडमध्ये संचारबंदी लागू केली असून इंटरनेट (Internet) सेवाही बंद केली आहे. त्यामुळे या भागातील विद्यार्थ्यांना महाराष्ट्र लोकसेवा आयोगाच्या (MPSC) परीक्षांचे ऑनलाईन अर्ज भरता येत नाहीत. तसेच संचारबंदी कायम राहिल्यास दि. १ नोव्हेंबर रोजी होणाऱ्या जिल्हा परिषदेच्या परीक्षेला (ZP Exam) मुकण्याची भीती विद्यार्थ्यांना आहे.
MPSC गट-क सेवा मुख्य परीक्षेसाठी अर्ज भरण्याची आज (दि. ३१) शेवटची तारीख होती. बीड आणि इतर जिल्ह्यातील अनेक उमेदवारांनी अजूनही अर्ज भरलेले नाहीत, त्यात इंटरनेट सेवा ठप्प आहे. त्यामुळे अर्ज भरण्यासाठी किमान ३ ते ४ दिवसांची मुदतवाढ देण्यात यावी, अशी मागणी स्पर्धा परीक्षा समन्वय समितीकडून आयोगाला करण्यात आली होती.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
