MCC NEET UG 2024: दुसऱ्या फेरीतील जागा वाटपाचा आज लागणार निकाल !

एज्युवार्ता न्यूज नेटवर्क 

वैद्यकीय समुपदेशन समितीमार्फत (MCC) राबवला जाणारा NEET UG 2024 सीट वाटपाचा निकाल (result) आज जाहीर होणार आहे. उमेदवार (candidates) त्यांचा निकाल MCC च्या  https://mcc.nic.in/ या अधिकृत वेबसाइटवर पाहू शकतात. अधिकृत वेबसाइटला भेट देऊन उमेदवारांना त्यांच्या लॉगिन क्रेडेंशियलसह सीट वाटप ऑर्डर (Seat Allotment Order) डाउनलोड करता येणार आहे. या निकालामध्ये उमेदवारांचे वाटप केलेले अभ्यासक्रम आणि महाविद्यालये (Courses and Colleges) यांचा तपशीलही असणार आहे.

सुधारित वेळापत्रकानुसार, या फेरीत जागा मिळवणाऱ्यांना 20 ते 26 सप्टेंबर दरम्यान कधीही वाटप केलेल्या संस्थेत रीपोर्ट करावा लागणार आहे. तसे न केल्यास, समुपदेशन नियमांनुसार त्यांची सुरक्षा ठेव जप्त केली जाईल. शिवाय, प्रथमच नोंदणी केलेल्या उमेदवाराला दुसऱ्या फेरीत जागा न दिल्यास, संबधित उमेदवार पुन्हा नोंदणी न करता थेट पुढील फेरीत सहभागी होऊ शकतात. 

वाटप केलेल्या महाविद्यालयात अहवाल देताना, उमेदवारांना मूळ कागदपत्रे आणि त्यांच्या साक्षांकित छायाप्रतींची आवश्यकता असेल. उदा. एमसीसीने दिलेले वाटप पत्र, neet ug 2024 प्रवेशपत्र, NEET UG 2024 निकाल किंवा रँक कार्ड, जन्मतारीख प्रमाणपत्र (जर मॅट्रिक्युलेशन प्रमाणपत्रात नमूद केले नसेल तर), दहावीचे, बारावीचे प्रमाणपत्र, बारावीची गुणपत्रिका,अर्जावर चिकटवलेल्या फोटोप्रमाणेच आठ पासपोर्ट आकाराची छायाचित्रे, ओळखीचा पुरावा (आधार/पॅन/ड्रायव्हिंग लायसन्स/पासपोर्ट), एनआरआय उमेदवारांनी प्रायोजकाच्या पासपोर्टची प्रत, दूतावासाचे प्रमाणपत्र, प्रायोजकत्व प्रतिज्ञापत्र (अभ्यासाच्या संपूर्ण कालावधीसाठी प्रायोजक तयार असल्याचे सांगत), नातेसंबंध प्रतिज्ञापत्र (प्रायोजकाशी उमेदवाराचे नाते) आदी कागदपत्रे आवश्यक असणार आहेत.