दुसऱ्या टप्प्यातील शिक्षक भरती; जाहिरात प्रसिद्ध करण्यास मुदतवाढ

एज्युवार्ता न्यूज नेटवर्क 

दुसऱ्या टप्प्यातील शिक्षक भरती प्रक्रिया (Second phase teacher recruitment process) केव्हा सुरू होणार याबाबत अनेक उमेदवार उत्सुकतेने वाट पाहत आहेत. मात्र, बऱ्याच व्यवस्थापनांना जाहिरात देण्यास अजून काही कालावधीचीआवश्यकता असल्याने पवित्र पोर्टलवर जाहिरात प्रसिद्ध करण्यासाठी 28 फेब्रुवारीपर्यंत मुदतवाढ (Extension) देण्यात आली आहे. 

राज्याच्या शालेय शिक्षण विभागातर्फे (Department of School Education) शिक्षक भरतीच्या दुसऱ्या टप्प्याच्या प्रक्रियेला सुरुवात करण्यात आली.  पवित्र प्रणालीमार्फत शिक्षण सेवक/शिक्षक पदभरतीच्या जाहिरातीसाठी 20 जानेवारी रोजी पोर्टल व सर्व व्यवस्थापनांना सुविधा उपलब्ध करून देण्यात आली होती. आत्तापर्यंत राज्यातील 1 हजार 216 व्यवस्थापन आणि विविध माध्यमांसाठी एकूण 1337 जाहिरातींची प्रक्रिया सुरू केली आहे.

शिक्षण विभागातर्फे 20 जानेवारी 2025 ते 20 फेब्रुवारी 2025 पर्यंत जाहिरातीसाठी सुविधा उपलब्ध करून देण्यात आली होती. परंतु बऱ्याच व्यवस्थापनांना जाहिरात देण्यास अजून काही कालावधीची आवश्यकता असल्याने पवित्र पोर्टलवर जाहिरात प्रसिद्ध करण्यासाठी 28 फेब्रुवारी पर्यंत मुदतवाढ देण्याचा निर्णय घेण्यात आला आहे.  राज्यातील सर्वच शैक्षणिक व्यवस्थापनांना शिक्षण विभागाने आवाहन केले आहे की, आपल्या अधिनस्त शाळांमधील शिक्षकांची रिक्त पदे भरण्यासाठी पवित्र पोर्टलवर जाहिरात देण्याची कार्यवाही करावी. पवित्र पोर्टलवर जाहिरात देण्यासाठी https://tait2022.mahateacherrecruitment.org.in या संकेतस्थळावर भेट द्यावी.  त्याचप्रमाणे शैक्षणिक संस्थांना पदभरती बाबत जाहिरात देण्यासाठी काही अडचणी आल्यास त्यांनी edupavitra2022@gmail.com या ईमेलवर संपर्क साधावा.