शाळांचे वीज बिले ग्रामपंचायत भरणार; जिल्हाधिकाऱ्यांचे आदेश 

एज्युवार्ता न्यूज नेटवर्क 

कोल्हापूर जिल्ह्यातील जिल्हा परिषद शाळांची थकीत वीज बिले (Electricity bills of Zilla Parishad schools) ग्रामपंचातीने २६ जानेवारीपूर्वी भरावी व २७ तारखेला त्याचा अहवाल देण्याचे आदेश कोल्हापूरचे  जिल्हाधिकारी अमोल येडगे (District Collector Amol Yedge) यांनी दिले आहेत. त्यामुळे जिल्हा परिषद प्राथमिक शाळा विद्युत दिव्यांनी झळकणार असल्याने शिक्षकांनी सुटकेचा निःश्वास सोडला आहे. मात्र, दुसऱ्या बाजूला अधिक आर्थिक अडचणीत असलेल्या ग्रामपंचायतींवर शाळांच्या वीज बिलांचा अतिरिक्त बोजा पडणार असल्याने ग्रामपंचायतींची आर्थिक घडी पुन्हा विस्कटणार आहे.

जिल्हा परिषद शाळेचे वीज बिल शाळा व्यवस्थापन समिती, शिक्षक लोकवर्गणीतून भरत असते. विजेचा फारसा वापरच नसल्याने नाममात्र वीज बिल भरण्यासाठी वेगळ्या निधीची गरज भासत नव्हती. मात्र, बदलत्या शिक्षण पद्धतीत डिजिटल शाळा, मोबाइल, टॅब, संगणक त्यासाठी इन्व्हर्टर आदींमुळे शाळेत वीजवापर वाढला आहे. त्यामुळे वीज बिलही जास्त येत असल्याने शिक्षकांची आर्थिक अडचण झाली होती. 

बिले भरली नसल्याने महावितरण कंपनीने जिल्ह्यातील अनेक शाळांचा वीजपुरवठा खंडित केला आहे. परिणामी डिजिटल शाळा विजेअभावी अडचणीत आल्या होत्या. याचा परिणाम शैक्षणिक गुणवत्तेवर होण्याची शक्यता असल्याने जिल्हाधिकारी येडगे यांनी शैक्षणिक प्रगतीला गती देण्यासाठी जिल्हा परिषद शाळांचे वीज बिले ग्रामपंचायतींना भरण्याचे आदेश काढले आहेत.