शिक्षण क्षेत्रात खळबळ : आयुक्तांसोबतच्या चर्चेला झुगारले, संस्थाचालकाला बेड्या 

एज्युवार्ता न्यूज नेटवर्क 

सध्या राज्यभर गाजत असलेल्या बनावट शालार्थ आयडी घोटाळा (School ID scam) प्रकरणामुळे एकच खळबळ उडाली आहे. शालेय शिक्षण आयुक्त सच्चिंद्रप्रताप सिंग (Education Commissioner Sachhidra Pratap Singh) यांनी नुकतीच पोलिस आयुक्त रविंद्रकुमार सिंगल यांची भेट घेऊन संपूर्ण चौकशी शिवाय कोणालाही अटक करू नये, अशी चर्चा केली होती. मात्र, दोन दिवस जात नाहीत तेच शालार्थ आयडी घोटाळा प्रकरणी पोलिसांनी पहिल्यांदाच एका संस्थाचालकाला अटक (Institution director arrested) केली आहे. त्यामुळे संपूर्ण शिक्षण क्षेत्रात भीतीचे वातावरण निर्माण झाले आहे. 

बनावट दस्तऐवजांच्या आधारे मुख्याध्यापक नियुक्तीच्या प्रकरणात पोलिसांनी संस्थाचालक चरण नारायण चोटुले (६३, भंडारा) यांना अटक केली आहे. प्रकृतीच्या कारणावरून संस्थाचालकाला रुग्णालयात दाखल करण्यात आले आहे. या कारवाईमुळे शिक्षणक्षेत्रात व विशेषतः संस्थाचालकांच्या वर्तुळात खळबळ उडाली आहे. 

‘सेट’ परीक्षेचे प्रवेशपत्र उपलब्ध; १५ जूनला होणार परीक्षा

चेटुले भंडारा जिल्ह्यातील लाखांदूर येथे राजश्री शिक्षण संस्था व नवोदय शिक्षण संस्था या दोन संस्थांमध्ये अध्यक्ष आहेत. आरोपी मुख्याध्यापक पराग पुडके याने नागपूर येथील एस. के. बी. उच्च प्राथमिक, माध्यमिक विद्यामंदिर, यादवनगरची बोगस व बनावट कागदपत्र तयार करून त्या आधारावर उपसंचालक उल्हास नरड यांनी आर्थिक व्यवहार करून चुकीच्या पद्धतीने राजश्री शिक्षण संस्थेच्या शाळेत मुख्याध्यापक पदासाठी मंजूरी दिली. त्या प्रकरणी संस्थाचालक चेटुले यांना अटक केली आहे. 

 पोलिसांनी या घोटाळ्यात पुडके, उपसंचालक उल्हास नरड यांच्यासह सात जणांना ताब्यात घेतले होते. या प्रकरणात पुडकेच्या कागदपत्रांवर चोटुलेची स्वाक्षरी होती. पोलिसांनी याची खातरजमा केल्यानंतर गुरुवारी रात्री भंडाऱ्यातून चेटुलेला ताब्यात घेतले. रुग्णालयातून सोडल्यावर पोलिसांकडून सखोल चौकशी करण्यात येणार आहे. त्यासाठी पोलिसांनी न्यायालयासमोर पोलिस कोठडीची मागणी केली आहे.