CUET UG 2024 : निकाल लवकरच प्रसिद्ध होणार; युजीसी अध्यक्षांची माहिती 

एज्युवार्ता न्यूज नेटवर्क 

मागील काही दिवसांपासून देशभरातील विद्यार्थी (CUET UG) निकालाकडे डोळे लावून बसले आहेत. त्याबाबत आता महत्त्वाची आणि मोठी बातमी समोर आली आहे. विद्यापीठ अनुदान आयोगाचे (UGC) अध्यक्ष प्रा. एम जगदीश कुमार (M Jagdish Kumar) म्हणाले की, पदवीपूर्व प्रवेशासाठी नॅशनल टेस्टिंग एजन्सी (NTA) लवकरच कॉमन युनिव्हर्सिटी एंट्रन्स टेस्ट CUET UG 2024 चा निकाल (CUET UG Result 2024) जाहीर करेल. त्याबाबत युजीसीने 'एक्स' या सोशल मिडिया अकाऊंटवर पोस्ट शेअर केली आहे.

यूजीसीचे अध्यक्ष जगदेश कुमार यांनी आश्वासित केले की, निकालाची तारीख लवकरच निश्चित केली जाईल. 'एनटीए ' ने CUET निकाल जाहीर करण्यासाठी संपूर्ण परिश्रम घेत आहे.  एजन्सीने 7 जुलै रोजी तात्पुरती उत्तर की प्रसिद्ध केली आणि उमेदवारांना 9 जुलैपर्यंत आक्षेप नोंदवण्याची संधी दिली. उमेदवार अंतिम उत्तर की आणि निकालासंबंधी तपशील जाहीर होण्याची आतुरतेने वाट पाहत आहेत. त्यामुळे हा निकाल लवकरच प्रसिद्ध केला जाईल. उमेदवार CUET UG 2024 चा निकाल अधिकृत वेबसाइट cuet.samarth.ac.in वर लिंक सक्रिय झाल्यानंतर पाहू शकतील. 

UGC ने यापूर्वी देशातील सर्व विद्यापीठांमध्ये शैक्षणिक सत्र 2024-25 ऑगस्टच्या पहिल्या आठवड्यापासून सुरू करण्याची घोषणा केली होती. परंतु CUET UG 2024 चा निकाल जाहीर न झाल्यामुळे विद्यापीठांमध्ये अद्याप प्रवेश प्रक्रिया सुरू झालेली नाही. आगामी शैक्षणिक सत्रात, देशातील 282 विद्यापीठांनी CUET UG 2024 च्या गुणवत्तेच्या आधारे विविध पदवीपूर्व अभ्यासक्रमांना प्रवेश जाहीर केला आहे. त्यात सर्व केंद्रीय विद्यापीठे आणि कमाल 157 खाजगी विद्यापीठांचाही समावेश आहे.

NTA ने CUET UG 2024 परीक्षा मे  15, 16, 17, 18, 21 आणि 22 रोजी आयोजित केली. परीक्षा संगणक-आधारित चाचणी (CBT) आणि पेन-आणि-पेपर या दोन्ही पद्धतींमध्ये घेण्यात आली. सर्वाधिक नोंदणी असलेल्या 15 विषयांसाठी, पेन-आणि-पेपर पद्धतीने परीक्षा घेण्यात आली, तर इतर 48 विषय सीबीटी मोडमध्ये आयोजित करण्यात आले.