इंजिनिअरींगचे शिक्षण घेणाऱ्या विद्यार्थ्याने ऑनलाईन गेम्ससाठी अवलंबला बुलेट चोरीचा मार्ग.. 

एज्युवार्ता न्यूज नेटवर्क

शिक्षणाचे माहेरघर म्हणून ओळखल्या जाणाऱ्या पुण्यात इंजिनिअरींगचे शिक्षण (Engineering education) घेणार्‍या तरूणांनी ऑनलाईन गेममध्ये पैसे खेळण्यासाठी चक्क चोरीचा मार्ग अवलंबल्याचे समोर आले आहे. बुलेट विक्रीमध्ये सहभागी असलेल्या चार आरोपींना पोलीसांनी ताब्यात घेतले आहे. त्यातील मुख्य आरोपी हा युट्युबवरील चोरीचे व्हिडिओ (Stealing videos on YouTube) पाहून चोरी करत असल्याचे खुद्द त्याने कबूल केले आहे. 

चाकण पोलीसांनी चार आरोपींना अटक केली आहे. त्यामध्ये दोन विद्यार्थी असून ते बी. टेकचे शिक्षण घेत असल्याचे समोर आले आहे. मुख्य आरोपी अभय सुरेश खर्डे याच्यासह रविंद्र निवृत्ती गव्हाणे, शुभम बाळासाहेब काळे, यश नंदकिशोर थुट्टे आणि प्रेम भाईदास देवरे या त्याच्या साथीदारांना अटक केलेल्या आरोपींची नावे आहेत.  

पोलिसांनी दिलेल्या माहितीनुसार, अनेक सीसीटीव्हीत तो बुलेट चोरी करताना कैद झाला होता. चाकण पोलिसांनी तब्बल १५० पेक्षा अधिक सीसीटीव्हीद्वारे आरोपीचा शोध घेतला. फरार आरोपी अभय ला संगमनेरमधून सापळा रचून अटक करण्यात आली. त्याच्याकडून ११ बुलेट, ७ इतर दुचाकी जप्त करण्यात आल्या आहेत.   

मुख्य आरोपी अभय सुरेश खर्डे हा ऑनलाइन गेम खेळायचा. ऑनलाइन गेममध्ये अभय हा लाखो रुपये हरला होता. लाखो रुपये गेममध्ये हरल्याने तो बुलेट चोरीकडे वळला. युट्युबवरील बुलेट चोरीचे व्हिडिओ पाहून बुलेट चोरी करायला शिकला. अभय बुलेट चोरून मित्रांच्या मदतीने काही हजारात बुलेट विकत असे, मिळालेल्या पैशांमधून पुन्हा ऑनलाइन गेम खेळायचा. अखेर काही बुलेट चोरीची प्रकरण चाकण पोलिसात गेल्याने अभय आणि त्याच्या साथीदारांचे बिंग फुटलं.