विद्यार्थ्यांच्या भविष्याची राखरांगोळी करणारा जीआर रद्द करा; अन्यथा... पवारांचा इशारा

एज्युवार्ता न्यूज नेटवर्क 

भरतीच्या आशेने अहोरात्र अभ्यास करणाऱ्या विद्यार्थ्यांच्या भविष्याची राखरांगोळी करणारा कंत्राटी भरतीचा हा जीआर (Contract Recruitment Gr) रद्द करावा. (Cancel Contract GR) अन्यथा काही दिवसांसाठी असलेल्या आपल्या सागर बंगल्यासमोर युवांचा जनसागर उसळेल हे लक्षात असू द्या, असा हल्लाबोल राष्टवादी काँग्रेस (शरदचंद्र पवार) पक्षाचे आमदार रोहित पवार (MLA Rohit Pawar) यांनी राज्याचे उपमुख्यमंत्री आणि गृहमंत्री असलेल्या देवेंद्र फडणवीस (Deputy CM Devendra Fadnavis) यांच्यावर केला आहे. 

आमदार पवार यांनी एक्स या सोशल मिडिया अकाउंटवर पोस्ट शेअर करत फडणवीस यांच्यावर हल्लाबोल केला आहे. जुन्या आठवणींना उजाळा देत रोहित पवार म्हणाले, गेल्या वर्षी आपण पत्रकार परिषद घेऊन कंत्राटी भरती रद्द करत असल्याची घोषणा केली होती. आता मात्र आपण आपल्या ‘लाडक्या’ सहकाऱ्यांना दलालीचा प्रसाद मिळावा म्हणून कंत्राटी भरती करत आहात हे आपल्याला शोभत नाही. 

वैद्यकीय शिक्षण खात्याने ६ हजार ८३० पदे कंत्राटी पद्धतीने भरण्यास मान्यता दिली असून स्मार्ट सर्व्हिसेस, क्रिस्टल, BVG या तीन कंपन्यांना काम देण्यात आले आहे. यापैकी स्मार्ट सर्व्हिसेस ही हसन मुश्रीफ यांच्याशी संबंधित तर क्रिस्टल ही आपले लाडके आमदार प्रसाद लाड यांची कंपनी आहे. आपल्या कृपेने या कंपन्यांना २०% सर्व्हिस चार्ज म्हणून वर्षाला ४० कोटी रुपये सरकार देणार असल्याचे रोहित पवार म्हणाले आहेत.