शाळेत न जाणाऱ्या पुण्याच्या सईने कोरले 'युरोपियन मॅथेमॅटिकल ऑलिम्पियाड'च्या पदकावर नाव 

एज्युवार्ता न्यूज नेटवर्क 

शिक्षण घेण्याची इच्छा असेल अन्  एखाद्या विषयाची मनापासून आवड असेल तर शाळेत न जाताही 'गणिता'सारख्या विषयावर प्रभूत्व  मिळवता येते.युरोपीयन गर्ल्स मॅथेमॅटिकल ऑलिम्पियाड (European Girls Mathematical Olympiad)या जागतिक पातळीवरील स्पर्धेत देशासाठी पदक मिळवता येते...होय ! हे शक्य करून दाखवले आहे, केवळ तिसरीपर्यंत औपचारिक शालेय शिक्षण घेणा-या पुण्यातील सई पाटील (saee patil )हिने."शाळेत गणित हा विषय (Mathematics subject)अत्यंत वाईट पद्धतीने शिकवला जातो, सूत्र आणि पाठांतवर जोर दिला जातो.ही पद्धत चूकीची आहे.खरंतर गणित हा खूप सुंदर विषय असून त्यांच्याकडे मी एक कला म्हणूनच पाहते.पुढे जाऊन मला शाळेत तो सोप्या पद्धतीने कसा शिकवयला हवा; यावर काम करायला आवडेल"असे सईने 'एज्युवार्ता'शी (Eduvarta) बोलताना सांगितले. 

होमी भाभा विज्ञान केंद्रातर्फे गुणवंत विद्यार्थ्यांचा शोध घेऊन त्यांना भौतिकशास्त्र, रसायनशास्त्र, जीवशास्त्र, खगोलशास्त्र, गणित अशा विषयांच्या आंतरराष्ट्रीय ऑलिम्पियाडसाठी मार्गदर्शन केले जाते.त्यासाठी राष्ट्रीय ऑलिम्पियाड परीक्षेचे आयोजन करून विद्यार्थ्यांची निवड केली जाते.त्याअंतर्गत सईची निवड झाली होती.पुण्याच्या सई पाटीलने १३ व्या युरोपीयन गर्ल्स मॅथेमॅटिकल ऑलिम्पियाडमध्ये कांस्य पदक मिळवण्याची कामगिरी करून पुण्याचा झेंडा परदेशात फडकवला.

युरोपीयन गर्ल्स मॅथेमॅटिकल ऑलिम्पियाड ही स्पर्धा जॉर्जियातील स्कालटुबो या शहरात ११ ते १७ एप्रिल या कालावधीत झाली.२०१५ पासून या स्पर्धेत भारत सहभागी होत आहे.त्यात यंदा भारतीय संघातील गुरुग्रामच्या गुंजना अगरवाल आणि तिरुअनंतपुरमच्या संजना चाको यांना रौप्यपदक, हिसारची लॅरिसा आणि पुण्याची सई पाटील यांना कांस्य पदक मिळाले. संघाचे नेतृत्व चेन्नई मॅथेमॅटिकल इन्स्टिट्यूटचे साहील म्हसकर, अदिती मुठखोड, अनन्या रानडे यांनी केले.

सई म्हणाली,माझी आई गणिताची शिक्षिका आहे.तर वडील इंजिनियर आहेत.आईमुळे गणिताची गोडी लागली.मी तिसरीनंतर औपचारिक शाळेत गेले नाही,पण मला गणित हा खूप विषय आवडतो.जेव्हा पासून आठवते तेव्हापासून मी अंक गणिताबरोबर खेळते.तिसरीत चौथीची गणिते सोडवत असे.हळूहळू सर्व वर्गांची गणिते मला सोडवू लागेल.गणित सोडवायला खूप आवडतात.जेव्हा मला गणित ऑलिम्पियाडची माहिती समजली. तेव्हा या स्पर्धेबाबत उत्सुकता वाटली.

स्पर्धेविषयी बोलताना सई म्हणाली, मला पाच वर्षांपूर्वी गणित ऑलिम्पियाडविषयी माहिती कळली.त्यावेळी पुण्यातील भास्कराचार्य प्रतिष्ठानकडून मला मार्गदर्शन मिळाले होते.गेल्या वर्षी या स्पर्धेसाठी तयारी करत होते.मात्र, विभागीय स्तराच्या पुढे जाता आले नाही. मात्र, या वर्षी  विशेष तयारी न करताही प्रशिक्षण शिबिरासाठी निवड झाली.निवड झाल्यावर वेगवेगळ्या प्रकारची गणिते सोडवण्याचा सराव करत होते.

स्पर्धेतील ५० देशांमध्ये भारताला अकरावे स्थान मिळाले. यंदा स्पर्धेतील भारताची कामगिरीही फार चांगली झाली.बिगर युरोपीय देशांमध्ये भारताला सहावा क्रमांक मिळाला.आशियाई देशांमध्ये भारताच्या पुढे केवळ चीन आणि जपान हे दोनच देश आहेत.त्यामुळे स्पर्धेत मिळालेले यश खूप आनंददायी आहे.सध्या मी शाळेत जात नसले तरी चेन्नई मॅथेमॅटिकल इन्स्टिट्यूटमध्ये शिक्षण घेण्याची इच्छा आहे,असेही सईने सांगितले. 
-----------------------------