देशात २१ बनावट विद्यापीठे, महाराष्ट्रात एक; धर्मेंद्र प्रधान यांची माहिती
देशातील २१ बनावट विद्यापीठामध्ये राज्यातील एका विद्यापीठाचा समावेश आहे. त्यामुळे शिक्षण घेणाऱ्या विद्यार्थ्यांनी या पासून सावध राहावे .बनावट विद्यापीठांमुळे हजारो विद्यार्थ्यांची फसवणूक होत आहे.
eduvarta@gmail.com 
एज्युवार्ता न्यूज नेटवर्क
सध्या देशभरात एकूण २१ बनावट विद्यापीठे (21 fake universities) कार्यरत आहेत. दिल्लीत सर्वांत जास्त आठ बनावट विद्यापीठे असून, महाराष्ट्र राज्यात एक विद्यापीठ बनावट आहे. अशी मोहिती शिक्षण मंत्री धर्मेंद्र प्रधान (Education Minister Dharmendra Pradhan) यांनी लोकसभेत दिली. देशातील २१ बनावट विद्यापीठामध्ये राज्यातील एका विद्यापीठाचा समावेश आहे. त्यामुळे शिक्षण घेणाऱ्या विद्यार्थ्यांना यापासून सावध राहावे लागणार आहे. बनावट विद्यापीठांमुळे हजारो विद्यार्थ्यांची फसवणूक होत आहे. त्यामुळे राज्यातील खासदाराकडून लोकसभेत प्रश्न उपस्थित करण्यात आला होता.
खासदार धैर्यशील माने यांच्या प्रश्नाला उत्तर देताना शिक्षणमंत्री प्रधान यांनी सांगितले की, केंद्र सरकारने राज्यांना पत्र लिहून बनावट विद्यापीठांवर कारवाई करण्यास सांगितले आहे. उत्तर प्रदेशात चार, तर आंध्र प्रदेश, केरळ आणि पश्चिम बंगालमध्ये प्रत्येकी दोन विद्यापीठे नकली आहेत. कर्नाटक, महाराष्ट्र आणि पुडुचेरी या राज्यांत प्रत्येकी एक नकली विद्यापीठ आहे. बोगस विद्यापीठे बंद करण्यासाठी कारवाई करण्यात यावी अशी सूचना सर्व राज्यांचे व केंद्रशासित प्रदेशांच्या मुख्य सचिवांना केली आहे.
महाराष्ट्रात नागपूरमधील राजा अरेबिक युनिव्हर्सिटीचे नावही बनावट विद्यापीठांच्या यादीत असल्याचे प्रधान यांनी सांगितले. देशात २१ बोगस विद्यापीठे असून त्यांची यादी सर्व खासदारांनी सोशल मीडियावर प्रसारित करावी. त्यामुळे या विद्यापीठांकडून विद्यार्थ्यांच्या होणाऱ्या फसवणुकीला आळा घालण्यास मदत होईल,असे केंद्रीय शिक्षण राज्यमंत्री सुकांत मजुमदार यांनी आवाहन केले आहे.
