विद्यापीठ पदनाम,वेतनश्रेणी बदलातील कर्मचाऱ्यांना सेवानिवृत्तीचे लाभ 

एज्युवर्ता न्यूज नेटवर्क 

राज्यातील सहा विद्यापीठांमध्ये पदनाम व वेतनश्रेणी बदलामुळे  (Designation and pay scale scam in universities) मोठा वाद निर्माण झाला होता. त्यावर राज्याच्या उच्च व तंत्र शिक्षण विभागाने (Department of Higher and Technical Education)अध्यादेश प्रसिद्ध करून संबंधित पदनाम व वेतनश्रेणीचा निर्णय रद्द केला होता. मात्र, त्यामुळे सेवानिवृत्त झालेल्या कर्मचारी व अधिकाऱ्यांना दिल्या जाणाऱ्या सेवानिवृत्ती लाभाचा प्रश्न निर्माण झाला. परंतु, सर्वोच्च न्यायालयाने दिलेल्या निर्णयामुळे (Judgments given by the Supreme Court) या प्रकरणातील कर्मचारी व अधिकाऱ्यांना सेवानिवृत्तीचे लाभ (Retirement benefits to employees and officers)देण्याबाबत अनुकूल परिस्थिती निर्माण झाली आहे. संबंधितांनी आठ दिवसात विद्यापीठाच्या शिक्षकेतर कक्षास संपर्क साधावा, अशा सूचना देण्यात आल्या आहेत.

सावित्रीबाई फुले पुणे विद्यापीठासह राज्यातील सहा विद्यापीठांमध्ये पदनाम व वेतनश्रेणी बदलाचा वाद समोर आला. त्यावर राज्य शासनाने संबंधित पदनाम व वेतनश्रेणी रद्द केल्या. त्याला काही कर्मचाऱ्यांनी उच्च न्यायालयात आव्हान दिले. मात्र, उच्च न्यायालयाने शासनाच्या बाजूने निर्णय दिला. त्यावर काही कर्मचारी सर्वोच्च न्यायालयात दाद मागण्यासाठी गेले. दरम्यानच्या काळात 9 कर्मचाऱ्यांनी न्यायालयात याचिका दाखल करून सेवानिवृत्तीचे लाभ देण्याबाबत विनंती केली. 8 नोव्हेंबर 2024 रोजी झालेल्या सुनावणीमध्ये सर्वोच्च न्यायालयाने सेवानिवृत्त कर्मचाऱ्यांना सेवानिवृत्तीचे नाव कशाप्रकारे द्यावी, याबाबत स्पष्ट मार्गदर्शन केले आहे. त्याबाबतचा अहवाल येत्या 27 डिसेंबर पर्यंत राज्य शासनास सादर करावयाचा आहे. त्यामुळे विद्यापीठाने सेवानिवृत्तीचे लाभ स्वीकारण्यास तयार असलेल्या इच्छुक सेवानिवृत्त शिक्षकेतर कर्मचारी व अधिकारी यांच्याकडून आठ दिवसाच्या आत लेखी स्वरूपात अर्ज मागविले आहेत.

गेल्या अनेक दिवसांपासून विद्यापीठातील शिक्षकेतर कर्मचारी व अधिकारी सेवानिवृत्तीच्या लाभांपासून वंचित होते. शासनाकडून दिल्या जाणाऱ्या लाभाचा फायदा मिळावा, यासाठी अनेक कर्मचारी विद्यापीठाकडे पाठपुरावा करत होते. अखेर विद्यापीठाने याबाबत परिपत्रक प्रसिद्ध केले असून सेवानिवृत्तीचे लाभ स्वीकारण्यास तयार असणाऱ्या कर्मचारी व अधिकाऱ्यांकडून अर्ज मागविले आहेत. सावित्रीबाई फुले पुणे विद्यापीठाच्या प्रभारी कुलसचिव डॉ.ज्योती भाकरे यांनी याबाबतचे परिपत्रक प्रसिद्ध केले आहे. 

------------

राज्याच्या उच्च व तंत्र शिक्षण विभागातर्फे 10 डिसेंबर रोजी या संदर्भातील पत्र प्रसिद्ध करण्यात आले होते. त्यानुसार विद्यापीठ प्रशासनाने तसेच राज्याचे प्रभारी उच्च व तंत्र शिक्षण संचालक डॉ. शैलेंद्र देवळाणकर यांनी यासंदर्भात पत्रक प्रसिद्ध करून इच्छुक उमेदवारांनी सेवानिवृत्तीच्या लाभासाठी अर्ज करावा, असे आदेश दिले आहेत.

-----------------------------------------

पदनाम व वेतनश्रेणी बाबत न्यायप्रविष्ट  असलेल्या प्रकरणातील ६ विद्यापीठातील शिक्षेकतर कर्मचाऱ्यांना सेवानिवृत्तीचे लाभ देण्याचे सर्वोच्च न्यायालयाचे निर्देश दिले आहेत. - अजय देशमुख, अध्यक्ष, महाराष्ट्र विद्यापीठ कर्मचारी महासंघ, महाराष्ट्र राज्य