बिशप स्कूलसमोरील वाहतूक कोंडी; नागरिक- प्रवासी हैराण,कोंडी फोडण्याची मागणी
कल्याणी नगर परिसरातील बिशप शाळेत शिक्षण घेणाऱ्या विद्यार्थ्यांना शाळा सुटल्यावर अनेक विद्यार्थी स्कूल बसने घरी जातात. तर काही विद्यार्थ्यांना त्यांचे पालक घेण्यासाठी येतात.मात्र, ही सर्व वाहने शाळेसमोर दोन्ही बाजूंनी उभी केली जातात. त्यामुळे या परिसरात दुपारी मोठी वाहतूक कोंडी होते.
eduvarta@gmail.com 
एज्युवार्ता न्यूज नेटवर्क
पुण्यातील वाहतूक कोंडीचा (traffic jam)फटका सध्या प्रत्येक नागरिकाला बसत आहे. मात्र,कल्याणीनगर परिसरातील बिशप शाळेमुळे (Bishop's School in Kalyaninagar area)होणाऱ्या वाहतूक कोंडीने या भागात राहणाऱ्या नागरिकांसह लोहगाव 'एअर पोर्ट' कडे (Lohegaon Air Port)जाणारे प्रवासी हैराण झाले आहेत. शाळेकडे मागील गेटचा पर्यायी उपलब्ध आहे. परंतु, शाळा प्रशासनाकडून या गेटचा वापर अधिक प्रमाणावर केल्याचे दिसून येत नाही. परिणामी या भागात वाहतूक कोंडी होते. त्यामुळे शाळा प्रशासन, शिक्षण विभाग आणि वाहतूक विभागाने यावर मार्ग काढावा,अशी मागणी नागरिकांकडून केली जात आहे.
शहरातील मध्यवस्ती भागातील शाळासह मुख्य रस्त्यालगत असलेल्या शाळा सुटल्यानंतर त्या भागात काही काळ मोठी वाहतूक कोंडी होते. त्यावर मार्ग काढण्यासाठी वेळोवेळी शिक्षण विभाग व वाहतूक पोलिसांकडून काही उपाय योजना सुचवण्यात आल्या आहेत.परंतु,त्यावर शाळांनी अद्याप ठोस पर्याय शोधलेला नाही.कल्याणी नगर परिसरातील बिशप शाळेत शिक्षण घेणाऱ्या विद्यार्थ्यांना शाळा सुटल्यावर अनेक विद्यार्थी स्कूल बसने घरी जातात. तर काही विद्यार्थ्यांना त्यांचे पालक घेण्यासाठी येतात.मात्र, ही सर्व वाहने शाळेसमोर दोन्ही बाजूंनी उभी केली जातात. त्यामुळे या परिसरात दुपारी मोठी वाहतूक कोंडी होते.
कल्याणी नगर येथून लोहगाव एअरपोर्ट जवळ आहे.त्यामुळे अनेक प्रवासी या मार्गाने एअरपोर्टकडे जातात. परंतु, बिशप शाळेसमोरील वाहतूक कोंडीचा फटका या प्रवाशांना बसतो. काही दिवसांपूर्वी केंद्रीय गृहमंत्री अमित शहा यांच्या दौऱ्यामुळे वाहतूक व्यवस्थेत बदल करण्यात आला होता.त्यावेळी काही शाळांनी विद्यार्थ्यांना सुट्टी देण्याचा निर्णय घेतला होता.त्यात एका बिशप शाळेचा सुध्दा समावेश होता.परिणामी वाहतूक कोंडीमुळे केवळ नागरिकच नाही तर विद्यार्थी व पालकही हैराण असल्याचे दिसून येते.
विद्यार्थ्यांच्या सुरक्षेला नेहमीच प्रथम प्राधान्य दिले पाहिजे. त्यामुळे रस्त्या ओलांडताना एखाद्या विद्यार्थ्यांचा अपघात झाला तर त्याला जबाबदार कोण? शाळेसमोर होणारी वाहतूक कोंडी पाहून अनेक दुचाकी चालक हे रॉंग साईट (चुकीच्या बाजू) ने जातात. वाहतूक विभागाच्या कर्मचाऱ्यांना या ठिकाणी चांगलीच तारेवरची कसरत करावी लागते. अनेक विद्यार्थी व पालक जीव मुठीत घेऊन रास्ता ओलांडतात. त्यामुळे शाळा व्यवस्थापनाने यावर मार्ग काढावा,अशी मागणी केली जात आहे.दरम्यान, याबाबत शाळेच्या मुख्याध्यापकांशी संपर्क साधण्याचा प्रयत्न केला असता संपर्क होऊ शकला नाही.
