वैद्यकीय अभ्यासक्रमाच्या जागा रिक्त ठेऊ नका; सुप्रीम कोर्टाचे निर्देश
एप्रिल 2023 मध्ये सुप्रीम कोर्टाने वैद्यकीय महाविद्यालयांमध्ये रिक्त राहिलेल्या सुपर स्पेशालिटी जागांचा मुद्दा उपस्थित केला होता. त्यावेळी सर्वोच्च न्यायालयाने वैद्यकीय महाविद्यालयांमधील 1हजार 3 सुपर स्पेशालिटी जागांच्या रिक्त जागा अत्यंत खेदजनक असल्याचे वर्णन केले होते.
eduvarta@gmail.com 
एज्युवार्ता न्यूज नेटवर्क
वैद्यकीय अभ्यासक्रमाच्या (medical course)जागा रिक्त राहू शकत नाहीत, असे सर्वोच्च न्यायालयाने ( Supreme Court ) शुक्रवारी स्पष्ट केले. यासोबतच न्यायालयाने केंद्र सरकारला राज्यांसह संबंधित भागधारकांसोबत बैठक घेऊन समितीच्या शिफारशी स्वीकारण्यास सांगितले. या प्रकरणावरील सुनावणी दरम्यान न्यायमूर्ती बीआर गवई आणि न्यायमूर्ती (medical course) केव्ही विश्वनाथन यांच्या खंडपीठाने सांगितले की, 'जागा रिक्त राहू शकत नाहीत हे लक्षात ठेवा.'
एप्रिल 2023 मध्ये सुप्रीम कोर्टाने वैद्यकीय महाविद्यालयांमध्ये रिक्त राहिलेल्या सुपर स्पेशालिटी जागांचा मुद्दा उपस्थित केला होता. त्यावेळी सर्वोच्च न्यायालयाने वैद्यकीय महाविद्यालयांमधील 1 हजार 3 सुपर स्पेशालिटी जागांच्या रिक्त जागा अत्यंत खेदजनक असल्याचे वर्णन केले होते. "एकीकडे आपण म्हणतो की,सुपर स्पेशालिटी डॉक्टरांची कमतरता आहे आणि दुसरीकडे इतक्या मौल्यवान जागा रिक्त आहेत." अशी टीका न्यायालयाने केली होती.
यानंतर, केंद्राने आरोग्य सेवा महासंचालकांच्या अध्यक्षतेखाली एक समिती स्थापन करण्याचा प्रस्ताव दिला होता. ज्यामध्ये राज्य आणि खाजगी वैद्यकीय महाविद्यालयांचे प्रतिनिधी होते. शुक्रवारी, केंद्र सरकारच्या वकिलांनी सांगितले की, स्टेकहोल्डर्सची एक समिती स्थापन करण्यात आली होती आणि तिने आपल्या शिफारसी दिल्या आहेत. त्यावर खंडपीठाने केंद्र सरकारला सर्व संबंधितांशी चर्चा करून ठोस नियोजन करण्यास सांगितले आणि तीन महिन्यांत या प्रकरणावर तोडगा काढण्याची मुदत दिली आहे. पुढील सुनावणी एप्रिलमध्ये होणार आहे.
