डी. फार्मसी विद्यार्थ्यांना दिलासा, एग्झिट परीक्षेशिवाय परवाना मिळणार..
मागील वर्षी फार्मसी उत्तीर्ण झालेल्या सर्व उमेदवारांना तात्पुरत्या स्वरुपात एका वर्षाच्या कालावधीसाठी मेडिकल व्यवसाय परवाना देण्यात यावा, असे निर्देश फार्मसी कौन्सिल ऑफ इंडियाने स्टेट फार्मसी कौन्सिलला दिले आहेत, त्यामुळे या विद्यार्थ्यांना काहीसा दिलासा मिळाला आहे.
eduvarta@gmail.com 
एज्युवार्ता न्यूज नेटवर्क
शैक्षणिक वर्ष 2023-24 (Academic year 2023-24) मध्ये डी. फार्मसी उत्तीर्ण झालेल्या विद्यार्थ्यांना काहीसा दिलासा मिळाला आहे. फार्मासिस्ट म्हणून नोंदणी करण्यासाठी घेण्यात येणारी एग्झिट परीक्षा (Exit Exam) अनिश्चित काळासाठी स्थगित करण्यात आली. त्यामुळे हजारो विद्यार्थी चिंतेमध्ये आहेत. मात्र, आता मागील वर्षी उत्तीर्ण झालेल्या सर्व उमेदवारांना तात्पुरत्या स्वरुपात एका वर्षाच्या कालावधीसाठी मेडिकल व्यवसाय परवाना (Pharmacy license) देण्यात यावा, असे निर्देश फार्मसी कौन्सिल ऑफ इंडियाने (Pharmacy Council of India) स्टेट फार्मसी कौन्सिलला दिले आहेत, त्यामुळे या विद्यार्थ्यांना काहीसा दिलासा मिळाला आहे.
आयुर्विज्ञान विभागाच्या राष्ट्रीय परीक्षा मंडळाकडून यंदा प्रथमच फार्मासिस्ट म्हणून नोंदणी करण्यासाठी एग्झिट परीक्षा घेतली जाणार होती. मात्र, फार्मसी कौन्सिल ऑफ इंडियाकडून ३ ते ५ ऑक्टोबर दरम्यान होणारी ही परीक्षा स्थगित करण्यात आली आहे. यामध्ये एग्झिट परीक्षेसाठी तीन पेपर घेतले जाणार आहेत. मात्र, या तीन पेपरसाठी ५ हजार ९०० रुपये शुल्क आकारला गेला. त्यावर फार्मसी क्षेत्रातून नाराजी व्यक्त करण्यात आली होती. तीन पेपर न घेता केवळ एकच पेपर घ्यावा आणि परीक्षा शुल्क कमी करावे, अशी मागणी प्राध्यापक आणि विद्यार्थ्यी संघटनांनी केली होती. त्यानंतर परीक्षा स्थगित करण्यात आली. मात्र, विद्यार्थ्यांना मिळणाऱ्या मेडिकल व्यावसायिक परवान्याचे काय? असा प्रश्न निर्माण झाला होता. त्यामुळे आता हा निर्णय घेण्यात आला आहे.
एग्झिट परीक्षा होणारच
डी. फार्मसी अभ्यासक्रम उत्तीर्ण होऊन जवळपास सहा महिने उलटल्यानंतरही एक्झिट परीक्षा झाली नसल्याने हे विद्यार्थी फार्मासिस्ट म्हणून नोंदणी करू शकले नाहीत. फार्मासिस्ट म्हणून नोंदणी करून रोजगाराचा मार्ग मोकळा करावा, अशी मागणी त्यांनी केली होती. त्यानुसार पीसीआयने या विद्यार्थ्यांची नोंदणी करण्याचे निर्देश राज्याच्या फार्मसी कॉन्सिलला दिले आहेत. एका वर्षासाठी ही नोंदणी केली जाणार आहे. मात्र, एका वर्षाने पुन्हा नोंदणी करण्यापूर्वी फार्मसी एक्झिट परीक्षा उत्तीर्ण करणे या विद्यार्थ्यांना बंधनकारक असणार असल्याचे फार्मसी कौन्सिलने स्पष्ट केले आहे.
