विद्यापीठाच्या परीक्षा शुल्कात 20 टक्क्यांनी वाढ; विद्यार्थ्यांवर भार

एज्युवार्ता न्यूज नेटवर्क 

सावित्रीबाई फुले पुणे विद्यापीठाशी संलग्न अहिल्यानगर ,नाशिक व पुणे जिल्ह्यातील महाविद्यालयांमधील विद्यार्थ्यांच्या परीक्षा लवकरच सुरू होणार असून विद्यापीठाने त्यासाठी परीक्षा अर्ज भरण्याची प्रक्रिया सुरू केली आहे.मात्र,परीक्षा शुल्कात 20 टक्क्यांनी वाढ केली आहे. त्यामुळे विद्यार्थ्यांवर परीक्षा शुल्काचा वाढीव भार पडला आहे. विद्यापीठातर्फे यासंदर्भातील परिपत्रक प्रसिद्ध करण्यात आले आहे. 

सावित्रीबाई फुले पुणे विद्यापीठाच्या व्यवस्थापन परिषदेत आणि परीक्षा व मूल्यमापन मंडळाच्या बैठकीत 2018 ते 20 मध्ये 15 टक्के शुल्क वाढ करण्यास मान्यता देण्यात आली होती. मात्र, कोरोना काळात शुल्कवाढ करणे संयुक्तिक नसल्याने विद्यापीठाकडून शुल्क वाढ केली गेली नाही. सुमारे सात वर्षांपासून विद्यापीठाने परीक्षा शुल्कात वाढ केली नव्हती. परंतु, 2023- 24 व 2024 - 25 या शैक्षणिक वर्षात नवीन राष्ट्रीय शैक्षणिक धोरणाच्या अंमलबजावणीला सुरुवात झाली आहे.त्यामुळे परीक्षा पद्धतीत व परीक्षा घेण्याच्या विषयांमध्ये काही प्रमाणात वाढ झाली आहे. मागील काही वर्षांचा विचार करता विद्यापीठाकडून 55% शुल्क वाढ करणे क्रमप्राप्त होते. मात्र विद्यापीठाने 20% शुल्क वाढ करण्याचा निर्णय घेतला आहे. वाढीव परीक्षा शुल्काचा तपशील परिपत्रकामध्ये प्रसिद्ध करण्यात आला आहे.

विद्यापीठाने परीक्षा शुल्क जमा करण्याच्या पद्धतीमध्ये सुद्धा बदल केला आहे. पूर्वी विद्यार्थी महाविद्यालयामध्ये परीक्षा शुल्क भरत होते. परंतु,आता सर्व परीक्षा शुल्क थेट विद्यापीठाच्या खात्यामध्ये जमा होत आहे. विद्यार्थ्यांमार्फत विद्यापीठाकडे जमा झालेल्या एकूण शुल्कातून महाविद्यालयाचा शुल्काचा भाग दिला जाणार आहे.