B.Ed नंतर आता M.Ed कोर्स देखील एक वर्षाचा
एक वर्षाचा बी.एड, दोन वर्षांचा पदवी शिक्षण कार्यक्रम किंवा ४ वर्षांचा एकात्मिक शिक्षक शिक्षण कार्यक्रम (आयटीईपी) अभ्यासक्रम अशा तिन्ही श्रेणी पैकी कोणत्याही एक अभ्यासक्रम उत्तीर्ण झालेला विद्यार्थी एक वर्षाच्या एम.एड अभ्यासक्रम करण्यास पात्र असेल.
eduvarta@gmail.com 
एज्युवार्ता न्यूज नेटवर्क
राष्ट्रीय शिक्षक शिक्षण परिषदेने (National Council for Teacher Education) NCTE नुकताच एक वर्षाचा बॅचलर ऑफ एज्युकेशन (Bachelor of Education) B.Ed अभ्यासक्रम पुन्हा सुरू करण्याचा निर्णय घेतला होता. त्या पाठोपाठ आता देशात एक वर्षाचा मास्टर ऑफ एज्युकेशन (M.Ed) कार्यक्रम देखील सुरू होणार आहे. (A one-year Master of Education (M.Ed) program is also about to start.) आतापर्यंत एम.एड.अभ्यासक्रम दोन वर्षांचा होता.
याविषयी अधिक माहिती देताना, एनसीटीईचे अध्यक्ष प्रोफेसर पंकज अरोरा म्हणाले की, "राष्ट्रीय शिक्षण धोरण २०२० च्या शिफारशींच्या आधारे, यूजीसीने जून २०२४ मध्ये पदव्युत्तर म्हणजेच पदव्युत्तर अभ्यासक्रम सुरू करण्यासाठी नवीन मार्गदर्शक तत्त्वे प्रसिद्ध केली होती. त्याच मार्गदर्शक तत्वांनुसार, एक वर्षाचा एम.एड.अभ्यासक्रम सुरू करण्यात येत आहे."
एक वर्षाचा बी.एड, दोन वर्षांचा पदवी शिक्षण कार्यक्रम किंवा ४ वर्षांचा एकात्मिक शिक्षक शिक्षण कार्यक्रम (आयटीईपी) अभ्यासक्रम अशा तिन्ही श्रेणी पैकी कोणत्याही एक अभ्यासक्रम उत्तीर्ण झालेला विद्यार्थी एक वर्षाच्या एम.एड अभ्यासक्रम करण्यास पात्र असेल, अशी माहिती अरोरा यांनी दिली.
अरोरा म्हणाले की, "एक वर्षाच्या मास्टर्स प्रोग्रामसाठी २०२५ मध्ये शिक्षण संस्थांकडून अर्ज मागवले जातील. त्यानंतर हा अभ्यासक्रम २०२६-२७ या सत्रापासून सुरू होईल. एक वर्षाचा एम.एड अभ्यासक्रम सुरू झाल्यावर, २०२६ पासून दोन वर्षांच्या एम.एड कार्यक्रमाचे प्रवेश घेतले जाणार नाहीत."
