अल्पवयीन विद्यार्थिनी चार महिन्यांची गर्भवती; कुंडली दोष निवारणाच्या नावाखाली अत्याचार

एज्युवार्ता न्यूज नेटवर्क 

लातूर शहरात कुंडलीतील दोष दूर करण्याच्या नावाखाली एका १७ वर्षीय अल्पवयीन विद्यार्थिनीवर अत्याचार झाल्याचा धक्कादायक प्रकार उघडकीस आला आहे. या घटनेमुळे पीडित विद्यार्थिनी चार महिन्यांची गर्भवती असल्याचे वैद्यकीय तपासणीत समोर आले. या प्रकरणी रामेश्वर हणमंतराव रामदासी उर्फ रामेश्वर महाराज (वय ४५, रा. ठाकरे चौक, लातूर) याच्याविरुद्ध विवेकानंद पोलीस ठाण्यात पॉक्सो कायद्यांतर्गत गुन्हा दाखल करण्यात आला असून पोलिसांनी आरोपीला अटक केली आहे.

फिर्यादीनुसार, आरोपी गेल्या अनेक वर्षांपासून एका आडतीवर पूजापाठ करण्यासाठी जात होता. त्या दरम्यान त्याची पीडित मुलीच्या वडिलांशी ओळख झाली. या ओळखीमुळे आरोपीचे त्यांच्या घरी येणे-जाणे वाढले. मुलीच्या कुंडलीत दोष असल्याचे सांगत तो दोष निवारणासाठी पूजा करावी लागेल, असे त्याने समजावले. जून महिन्यापासून आरोपी पूजापाठाच्या निमित्ताने मुलीच्या घरी नियमितपणे येत होता. याच कालावधीत त्याने अल्पवयीन मुलीवर अत्याचार केल्याचा आरोप आहे. मात्र, या प्रकाराची कुटुंबीयांना काही काळ कल्पना आली नव्हती.

मुलीच्या पोटात दुखू लागल्यानंतर तिला उपचारासाठी शासकीय रुग्णालयात दाखल करण्यात आले. वैद्यकीय तपासणीत ती गर्भवती असल्याचे स्पष्ट झाले. वैद्यकीय अधिकाऱ्यांनी दिलेल्या वैद्यकीय-कायदेशीर नोंदीच्या आधारे विवेकानंद पोलीस ठाण्यात घटनेची नोंद झाली. पोलिसांनी तपास करून आरोपीला अटक केली. आरोपी रामेश्वर महाराज गेल्या सुमारे ३० वर्षांपासून पूजापाठ करीत असून शहरातील एका प्रतिष्ठित देवस्थानात पुजारी म्हणूनही कार्यरत आहे.

कुंडली दोष निवारणाच्या नावाखाली अल्पवयीन मुलीवर अत्याचार केल्याचा गंभीर आरोप या प्रकरणात आहे. आरोपीने अशाच प्रकारची कृत्ये अन्य कुणावर केली आहेत का, याबाबत पोलिसांकडून तपास सुरू आहे. लातूर पोलिसांनी सांगितले की, या प्रकरणाचा सर्व बाजूंनी सखोल तपास केला जाईल आणि कायद्यानुसार पुढील कारवाई केली जाईल.