RTE Admission : कागदपत्रांच्या नावाखाली नाकारला विद्यार्थ्यांचा प्रवेश; १८ कागदपत्रांची मागणी
काही शाळा कागदपत्रांचे कारण देत पालकांनी पिळवणूक करत विद्यार्थ्यांचा प्रवेश नाकारत आहेत. पुण्यातील एका नामांकित शाळेत असाच काहीसा प्रकार उघडकीस आला आहे.
eduvarta@gmail.com 
एज्युवार्ता न्यूज नेटवर्क
आर्थिक दुर्बल व वंचित घटकातील बालकांना आरटीईच्या (RTE) माध्यमातून स्वयंअर्थसहाय्यिता शाळा, विनाअनुदानित शाळा, खासगी पोलिस कल्याणकारी शाळा, महापालिकेच्या स्वयंअर्थसहाय्यिता शाळांमध्ये प्रवेश दिला जातो. त्यासाठी शाळा सुरू होऊन दीड महिन्यानंतर का होईना प्रवेश प्रक्रिया (RTE Admission Process) सुरू झाली आहे. मात्र, काही शाळा कागदपत्रांचे कारण देत पालकांची पिळवणूक करत विद्यार्थ्यांचा प्रवेश नाकारत (Students denied entry) आहेत. पुण्यातील सेनापती बापट रस्त्यालगतच्या एका नामांकित शाळेत असाच काहीसा प्रकार उघडकीस आला आहे.
आरटीई प्रवेशासाठी शिक्षण विभागाने कागदपत्र तपासणीसाठी पडताळणी समिती स्थापना केली आहे. या समितीकडून कागदपत्र तपासली जातात. मात्र, प्रवेशासाठी लागणाऱ्या कंगदपत्रांसह इतर कागदपत्रांची मागणी शाळेकडून केली जात आहे. तसेच कागदपत्राच्या नावाखाली विद्यार्थ्यांचा प्रवेश नाकारला जात असल्याच्या तक्रारी पालकांनी केल्या आहेत. पालकांनी शिक्षण विभागाकडे सुध्दा शाळांच्या तक्रारी केल्या आहेत. त्यामुळे सामान्य नागरीकांच्या आरटीई प्रवेशाच्या समस्या कोण सोडवणार असा प्रश्न या निमित्ताने निर्माण झाला आहे.
या शाळेकडून जिल्हा परिषदेचे पत्र, हमीपत्र, शाळेचा प्रवेश अर्ज, शाळेचा मेडिकल रिपोर्ट, विद्यार्थ्याचा जन्म दाखला, या कागदपत्रांसह विद्यार्थ्यांचे वैद्यकीय प्रमाणपत्र, , विद्यार्थ्याचे आधार कार्ड, विद्यार्थ्याचे जातीचे प्रमाणपत्र, विद्यार्थ्याचे रिपोर्ट कार्ड, पालकाचे जात प्रमाणपत्र, पॅन कार्ड, आधार कार्ड, उत्पन्नाचा दाखला, भाडे करारपत्र, राशनकार्ड, वाहन चालवण्याचा परवाना, लाईट बिल, रहिवाशी प्रमाणपत्र, गॅस बुक, यांसारख्या एक ना अनेक कागदपत्रांची मागणी केली जात आहे. त्यामुळे पालक त्रस्त झाले असून शिक्षण विभागाकडे तक्रार केली आहे. मात्र, तिथे देखील निराशाच पदरी पडली आहे.
________________________
कागदपत्राच्या नावाखाली मला शाळेकडून १८ कागदपत्रांच्या नावाची यादी देण्यात आली. पालकांचे जात प्रमाणपत्र असताना मुलाचे जात प्रमाणपत्र देण्याची मागणी करण्यात आली. सेड्युल कास्ट मध्ये येत असून उत्पन्नाचे प्रमाणपत्र मागीतले जात आहे. यादीमध्ये दिलेली कागदपत्र दोन दिवसांत जमा करा अन्यता विद्यार्थ्याचा प्रवेश रद्द करण्यात येणार असल्याचे सांगितले जात आहे. तसेच शाळेकडे सादर केलेले कागदपत्र परत शाळेने आम्हाला परत दिले असून मुलाचा प्रवेश नाकारला आहे.
- वैशाली भोसले (पालक)
